Zargarlik buyumlarini bojxona to‘lovlarisiz O‘zbekistonga noqonuniy olib kirishga urinishlar uchrab turibdi. Shunday holatlardan biri “G‘ishtko‘prik” chegara bojxona postida qayd etildi. Bu haqda Davlat bojxona qo‘mitasi axborot xizmatining ma’lumotlariga tayanib, O‘zA xabar bermoqda.
Toshkent viloyati bojxona boshqarmasi “G‘ishtko‘prik” chegara bojxona posti xodimlari va Toshkent viloyati IIB vakili bilan hamkorlikda “G‘ishtko‘prik” chegara bojxona postiga piyoda holda kirib kelgan M.R.ga tegishli bo‘lgan qo‘l yuklari xolislar ishtirokida bojxona ko‘rigidan o‘tkazildi. Natijada, og‘zaki so‘rovda bojxona xodimiga ma’lum qilinmagan, qiymati qariyb 61 million so‘mlik, umumiy vazni 1 217 grammdan iborat bo‘lgan oq metalldan yasalgan 184 dona har xil turdagi zargarlik buyumi yashirincha olib kelinayotganligi aniqlandi.
Shu kabi yana bir holatda fuqaro A.A.ning qo‘l yuklari bojxona ko‘rigidan o‘tkazilganida, uning qo‘l yuklari orasida bojxona xodimiga og‘zaki so‘rovda ma’lum qilinmagan, qiymati 42 680 000 so‘mlik umumiy og‘irligi 194 gramm bo‘lgan 28 dona sariq metalldan yasalgan zargarlik buyumi olib kirilayotganligi fosh etildi.
Ushbu post orqali respublikaga kirib kelayotgan 10 nafar fuqaroning qo‘l yuklarida bojxona xodimining og‘zaki so‘rovida ma’lum qilinmagan 121 million so‘mga yaqin 82 dona, umumiy og‘irligi 600 grammdan ortiq bo‘lgan turli zargarlik buyumlari mavjudligi aniqlandi.
Hozirda ushbu holatlar yuzasidan bojxona tekshiruvlari davom ettirilmoqda.
Izoh (0)