Baydenda teri saratoni aniqlandi, uni operatsiya qilishdi

Fevral oyida AQSH prezidenti Jo Baydenning ko‘krak qismidagi terisidan saraton o‘simtasi olib tashlandi. Bu haqda Oq uy shifokori Kevin O’Konnorning maktubida aytiladi.

Baydenning shifokori aytishicha, operatsiyadan keyin prezidentning terisi yaxshi bitgan, biopsiya (zararlangan to‘qimani kesib olib tekshirish) esa bu odamlarda keng tarqalgan bazal hujayrali karsinoma ekanini ko‘rsatgan. Shifokor davomiy muolaja talab qilinmasligini ta’kidladi.

“Biopsiya joyi yaxshi bitib ketdi, prezident keng qamrovli tibbiy yordam doirasida dermatologik kuzatuvda bo‘lishni davom ettiradi”, — deb yozadi O’Konnor o‘z maktubida.

Uning ta’kidlashicha, bu o‘simta boshqa jiddiyroq teri saratoni kabi tarqalib ketmaydi yoki metastaz bermaydi.

Yanvar oyi o‘rtalarida Jo Baydenning rafiqasi Jill jarrohlik amaliyotini o‘tkazgandi — birinchi xonimdan teri saratoni o‘smalari olib tashlangan. Jill Baydenga ham bazal hujayrali karsinoma tashxisi qo‘yilgan.

Fevral oyida Jo Bayden prezident lavozimida keyingi muddatda ishlashga “loyiq” deb topilgani xabar qilingandi. Amerikaning 80 yoshli yetakchisi Uolter Rid nomidagi Milliy harbiy tibbiyot markazida uch soatlik tibbiy ko‘rikdan muvaffaqiyatli o‘tgan.

Bayden 2024-yilgi prezidentlik saylovlarida ishtirok etish haqida o‘ylamoqda. Uning so‘zlariga ko‘ra, yosh va sog‘ligi bunga to‘sqinlik qilmaydi.