Qozog‘iston viloyatlarining sovetcha nomlarini qozoqchaga o‘zgartirish respublika aholisini ruhlantiradi, dedi Ulitov viloyati hokimi Berik Abdigaliuli “Ulitov viloyatining maʼnaviy rivojlanishi” anjumanida. Bu haqda Tengrinews xabar berdi.
“Chunki sovetlar davrida viloyatlarga ma’muriy nom berish an’anasi bo‘lgan. Bunday nomli viloyatlar haligacha bor”, — deya eslatdi Abdigaliuli.
U Pavlodar viloyatini Bayanauil, Shimoliy Qozog‘iston viloyatini Qiziljar, G‘arbiy Qozog‘iston viloyatini Oqjayik, Sharqiy Qozog‘iston viloyatini Oltoy viloyati deb o‘zgartirishni taklif qildi. Hokim bular “ming yillik tarixga ega muqaddas yerlar” ekanini ta’kidladi.
U yangi tashkil etilgan Jetisuv va Abay (sobiq Olma-Ota va Semipalatinsk viloyatlari tarkibiga kirgan) viloyatlariga “qozoqlarning muqaddas yerlari va buyuk shaxs sharafiga” nom berilganini esladi.
“Bir yiligina avval tashkil etilgan viloyatimizning Ulitov deb nomlanishi bizga o‘zgacha ruh va kuch bag‘ishlaydi. Viloyat tashkil etilganda uni Markaziy Qozog‘iston viloyati deb atash takliflari bo‘lgandi. Biroq Qosim-Jo‘mart To‘qayev adolatli va tarixiy qaror qabul qilib, uni Ulitov viloyati deb atadi”, — dedi Berik Abdigaliuli.
2023-yilning fevral oyida Qozog‘iston hukumati 2025-yilgacha 3 ming aholi punkti va ko‘chalarning “mafkuraviy eskirgan” nomlari o‘zgarishi haqida e’lon qilgandi. Bosh vazir o‘rinbosari Oltoy Kulginov “tarixiy shaxslar” ro‘yxati tuzilib, yangi nom tanlashda ularga tayanilishini aytdi. “Nom tanlashda, albatta, mahalliy aholining fikri inobatga olinadi, taklif etilayotgan nomning tarixi o‘rganiladi”, — deb ishontirdi u.
Izoh (0)