Қозоғистон вилоятларининг советча номларини қозоқчага ўзгартириш республика аҳолисини руҳлантиради, деди Улитов вилояти ҳокими Берик Абдигалиули “Улитов вилоятининг маънавий ривожланиши” анжуманида. Бу ҳақда Tengrinews хабар берди.
“Чунки советлар даврида вилоятларга маъмурий ном бериш анъанаси бўлган. Бундай номли вилоятлар ҳалигача бор”, — дея эслатди Абдигалиули.
У Павлодар вилоятини Баянауил, Шимолий Қозоғистон вилоятини Қизилжар, Ғарбий Қозоғистон вилоятини Оқжайик, Шарқий Қозоғистон вилоятини Олтой вилояти деб ўзгартиришни таклиф қилди. Ҳоким булар “минг йиллик тарихга эга муқаддас ерлар” эканини таъкидлади.
У янги ташкил этилган Jetисув ва Абай (собиқ Олма-Ота ва Семипалатинск вилоятлари таркибига кирган) вилоятларига “қозоқларнинг муқаддас ерлари ва буюк шахс шарафига” ном берилганини эслади.
“Бир йилигина аввал ташкил этилган вилоятимизнинг Улитов деб номланиши бизга ўзгача руҳ ва куч бағишлайди. Вилоят ташкил этилганда уни Марказий Қозоғистон вилояти деб аташ таклифлари бўлганди. Бироқ Қосим-Жўмарт Тўқаев адолатли ва тарихий қарор қабул қилиб, уни Улитов вилояти деб атади”, — деди Берик Абдигалиули.
2023 йилнинг февраль ойида Қозоғистон ҳукумати 2025 йилгача 3 минг аҳоли пункти ва кўчаларнинг “мафкуравий эскирган” номлари ўзгариши ҳақида эълон қилганди. Бош вазир ўринбосари Олтой Кулгинов “тарихий шахслар” рўйхати тузилиб, янги ном танлашда уларга таянилишини айтди. “Ном танлашда, албатта, маҳаллий аҳолининг фикри инобатга олинади, таклиф этилаётган номнинг тарихи ўрганилади”, — деб ишонтирди у.
Изоҳ (0)