Ukrainada Rossiya bosqini boshlanganidan beri AQSH Mudofaa vazirligi 4000 dan ortiq ukrainalik harbiylarni jangga tayyorladi. Bu haqda AQSH shtab boshliqlari qo‘mitasining operatsiyalar bo‘limi boshlig‘i general-leytenant Duglas Simsga tayanib, CNN xabar bermoqda.
“Yanvar oyidan beri AQSH harbiylari yana 1000 nafar ukrainalikni tayyorgarlikdan o‘tkazdi, Qo‘shma Shtatlar tomonidan o‘qitilgan Ukraina qo‘shinlarining umumiy soni 4000 nafardan sal ko‘proqqa yetdi”, — dedi general Kongressdagi tinglovda.
Xususan, Oklaxoma shtatidagi Fort-Sillda Patriot havo mudofaa tizimi bilan ishlovchi guruh tayyorlanmoqda. Simsning so‘zlariga ko‘ra, tayyorgarlik tez orada yakunlanadi.
AQSHdagi Ukraina mudofaa attashesi Boris Kremenetskiy Patriot’dan foydalanishni o‘rganish uchun boshqa havo hujumiga qarshi mudofaa tizimlaridan foydalanish tajribasiga ega harbiy xizmatchilar yuborilganini ta’kidladi. Buning yordamida ularga asoslarni o‘rgatish shart bo‘lmagan va tayyorgarlik vaqti bir necha oydan bir necha haftagacha qisqargan.
Ukraina harbiylari Buyuk Britaniya, Germaniya, Daniya va Polsha kabi boshqa G‘arb davlatlarida ham o‘qitilmoqda. Germaniya mudofaa vaziri Boris Pistoriusning aytishicha, Rossiya harbiy amaliyoti boshlanganidan beri nemis harbiylari Ukraina Qurolli kuchlarining 1200 ga yaqin harbiy xizmatchisini tayyorlagan. Uning so‘zlariga ko‘ra, yil oxirigacha ularning soni 3 mingdan oshadi, jumladan, ukrainaliklar Marder piyoda jangovar mashinasi va Leopard 2 tankini boshqarishni o‘rganmoqda.
Ukrainaning Buyuk Britaniyadagi elchisi Vadim Pristaykoning ta’kidlashicha, Buyuk Britaniyadagi ukrainalik uchuvchilar G‘arb jangovar samolyotlarida mashq qilishni boshlagan. Shu bilan birga, hozircha hech bir davlat Kiyevga qiruvchilar yetkazib berishini e’lon qilmagan.
Izoh (0)