Daniyaning bir palatali parlamenti (Folketing) davlat bayrami sifatida nishonlanadigan Buyuk ibodat kunini bekor qilish uchun ovoz berdi, deb yozmoqda “Dr.dk” nashri.
Bayram 1686-yilda joriy etilgan, u Pasxadan keyingi to‘rtinchi juma kuni nishonlanadi, bu yil bayram 5-mayga to‘g‘ri keladi. 2024-yildan boshlab Buyuk ibodat kuni davlat bayrami maqomini yo‘qotadi, 95 nafar parlamentariy ushbu qarorni yoqlab, 68 nafari qarshi ovoz berdi.
Daniya bosh vaziri Mette Frederiksen bu chora mudofaa budjetini oshirishga qaratilganini aytdi: “Bu hozirgi xavfsizlik holati bilan bog‘liq. Daniya mudofaa uchun imkon qadar ko‘proq pul sarflashi kerak”.
Mamlakat Moliya vazirligi ma’lumotlariga ko‘ra, bayramning bekor qilinishi va qo‘shimcha ish kunining joriy etilishi davlat g‘aznasiga 3 milliard kron (taxminan 400 million yevro) daromad keltiradi. Daniya hukumati NATO a’zosi sifatida alyansga a’zo davlatlar tomonidan tuzilgan shartnomalarga muvofiq, yalpi ichki mahsulotning kamida 2 foizini mudofaaga sarflashni ta’minlashga intilmoqda. Ular Rossiyaning Ukrainadagi bosqini fonida 2030-yilgacha bu maqsadga erishmoqchi, deb yozadi AP. NATO ma’lumotlariga ko‘ra, Daniya 2022-yilda mudofaa uchun YIMning 1,39 foizini sarflagan.
Bayramning bekor qilinishi butun mamlakat bo‘ylab noroziliklarga sabab bo‘ldi. Daniyada aholining 73 foizdan ortig‘i lyuteran cherkoviga boradi. Kasaba uyushmalari onlayn petitsiya boshladi, u 500 000 ga yaqin imzo to‘pladi. Fevral oyida Kopengagendagi parlament binosi yonida norozilik namoyishi bo‘lib o‘tdi.
Izoh (0)