Italiya razvedkasi Rossiyaning Ukrainadagi urushda ko‘zlagan maqsadi barbod bo‘lganini ma’lum qilib, Moskvaning keyingi harakatlarini prognoz qildi. Bu haqda La Stampa xabar berdi.
Razvedkaga ko‘ra, endilikda Rossiyaga uzoqroq urushga tayyorgarlik ko‘rish uchun Ukrainaga qarshi harbiy harakatlarda operativ pauza zarur. Bu vaqt ichida Rossiya harbiy-sanoat kompleksi ishini qayta boshlashi mumkin. Italiya razvedkasi parlamentga taqdim etgan hisobotida shunday prognoz berilgan. G‘arb tomonidan Ukrainaga bostirib kirish munosabati bilan qo‘llanilgan sanksiyalar ta’sirini Rossiya yirik ishlab chiqarish quvvatiga qaramay his qila boshlagani ta’kidlangan.
Bundan tashqari, razvedkachilar Rossiyada urushni qo‘llab-quvvatlash darajasi pasayganini qayd etmoqda. Shunga qaramay Kreml rahbariyati harakatlarini ma’qullaydiganlar ham uchrab turadi. Bu Rossiya ommaviy axborot vositalarining tashviqoti bilan bog‘liq ekani aytilgan. Shu bilan birga, Rossiyaning G‘arb mamlakatlaridagi siyosiy jarayonlarga aralashishi haqida ma’lum qilingan.
“Moskva NATO mamlakatlaridagi siyosiy dinamika va qarorlar qabul qilish jarayonlariga aralashishni to‘xtatmaydi. Kiberhujumlar, dezinformatsiya, shantaj, migratsiya va energetika kabi vositalardan foydalanish kabi manipulyativ usullariga oldingidan ham ko‘proq murojaat qilmoqda. G‘arbning Rossiyaga energetik qaramlikka muqobil yo‘l topish istagini hisobga olsak, ikkinchisi o‘z ahamiyatini yo‘qotishga mahkumdir”, — deyiladi xabarda.
Italiya maxsus xizmatlari Putinning rejalari “Ukraina ssenariysini noto‘g‘ri tushunish tufayli” barbod bo‘lganini, shu bilan birga, Rossiyaning yadro qurolidan foydalanish ehtimoli pastligini xulosa qildi.
Izoh (0)