Hindistonning Kerala shtatidagi ibodatxona marosimlarda tirik fildan foydalanishni to‘xtatdi — uning o‘rniga mexanik fil qo‘yildi. Robot fil People for Ethical Treatment (PETA) hayvonlarni himoya qilish tashkiloti va aktrisa Parvati Tiruvotu tomonidan sovg‘a qilingan.
The Indian Express nashrining yozishicha, mexanik fil ishtirokidagi ilk marosim 26-fevral kuni o‘tkazilgan.
Hindistonda turli marosimlar uchun tutqunlikda saqlanayotgan fillar qattiq mashg‘ulotlardan o‘tkaziladi, xususan, jonivorlar ayovsiz kaltaklanadi, deb ta’kidladi PETA. Hayvonlar huquqlarini o‘rganish markazi ma’lumotlariga ko‘ra, 2018-yildan 2023-yilgacha Keralada 150 ga yaqin tutqunlikdagi fil nobud bo‘lgan.
PETA ta’kidlashicha, odamlar o‘yin-kulgi uchun foydalanadigan fillar ko‘pincha g‘ayritabiiy xatti-harakatlar qila boshlaydi, bu odamlarning o‘limiga ham sabab bo‘ladi.
Heritage Animal Task Force ma’lumotlariga ko‘ra, fillar Keralada so‘nggi 15 yil ichida 500 dan ortiq odamni o‘ldirgan.
Taxminan, 40 yilni tutqunlikda o‘tkazgan fillardan biri o‘n kishining o‘limiga sabab bo‘lgan. Biroq PETA ma’lumotlariga ko‘ra, u hali ham mahalliy festivallarda muntazam ishtirok etmoqda.
Izoh (0)