Milliy Olimpiya Qo‘mitasida 1-mart, chorshanba kuni O‘zbekiston Milliy avtomobil klubining navbatdan tashqari hisobot-saylov konferensiyasi bo‘lib o‘tdi.
Unda tashkilot nomini o‘zgartirish, uning rahbariyati tarkibini qayta shakllantirish kabi masalalar ko‘rib chiqildi.
Tashkilotning O‘zbekiston Milliy avtomobil klubi nomi O‘zbekiston Milliy avtosport va karting federatsiyasiga o‘zgartirildi. Shundan so‘ng tashkilotga yangi rais saylandi. Unda avtosport olamida ulkan tajribaga ega bo‘lgan poygachi Anvar Abdumajitovich Ergashev nomzodi ilgari surildi va konferensiya ishtirokchilari tomonidan bir ovozdan ma’qullandi.
Ma’lumot uchun, Anvar Ergashev 1973-yil tavallud topgan. Ralli va avtokross bo‘yicha ko‘p karra mamlakat chempioni, bir qator xalqaro musobaqalar g‘olibi, Jahon kubogi bosqichlari ishtirokchisi. Shuningdek, u o‘zbekistonlik poygachilar orasida “Dakar” rallisida ishtirok etish (2022) litsenziyasiga ega bo‘lgan ilk sportchi hisoblanadi.
Tadbirda Aleksey Soy tashkilot Bosh kotibi lavozimiga saylandi.
Izoh (0)