Osiyo Kubogi—2023 musobaqasining o‘tkazilish sanasi ma’lum bo‘ldi
Futbol bo‘yicha Osiyo Kubogi—2023 bo‘lib o‘tadigan sana ma’lum bo‘ldi.
Futbol mutaxassisi Alisher Nikimbayevning xabar berishicha, musobaqa 2024-yilning 12-yanvaridan 10-fevraliga qadar bo‘lib o‘tadi. Ta’kidlash kerakki, bu safargi qit’a birinchiligi avvalgilaridan kechroq boshlanadi va kechroq yakunlanadi. 2011-yil Qatarda o‘tkazilgan musobaqa 7-yanvardan 29-yanvarga qadar, 2015-yil Avstraliyadagi turnir 9-yanvardan 31-yanvargacha, 2019-yil BAAda o‘tgan musobaqa 5-yanvardan 1-fevralga qadar davom etgandi.
“Musobaqaning bir hafta kech boshlanishi futbol mavsumi noyabr—dekabr oylarida yakunlanadigan jamoalarga (O‘zbekiston, Tojikiston, Qirg‘iziston, Xitoy) tayyorgarlik uchun qo‘shimcha vaqt beradi”, — deb yozadi Nikimbayev.
Eslatib o‘tamiz, 2023-yilgi musobaqa Xitoyda o‘tishi belgilangandi. Biroq mamlakat koronavirus bilan bog‘liq vaziyat sabab Osiyo Kubogini o‘zida o‘tkaza olmasligi ma’lum bo‘ldi va 2022-yilning may oyida Xitoydan mezbonlik olib qo‘yilgandi. Qatardan tashqari ushbu musobaqa mezbonligi uchun Janubiy Koreya va Indoneziya ham da’vogarlik qilgandi. Yakunda OFK Qatar variantini ma’qul ko‘rgan edi.
