Rossiya shaxmat federatsiyasi Osiyo shaxmat federatsiyasi a’zosiga aylandi

Rossiya shaxmat federatsiyasi Osiyo shaxmat federatsiyasiga (ACF) qo‘shildi. 

Osiyo shaxmat federatsiyasi bosh assambleyasi a’zolari RSHFni tashkilotga qo‘shish uchun ovoz berdi. Ovoz berish jarayonlari Abu-Dabida bo‘lib o‘tdi. Rossiyani AFCga qo‘shilishi uchun 29 nafar delegat rozilik berdi, bir nafari qarshi chiqdi va 6 nafar delegat betaraf qoldi.

RSHFning Yevropa shaxmat ittifoqidan (ECU) Osiyo shaxmat federatsiyasiga o‘tkazish to‘g‘risidagi qaror tashkilot kuzatuv kengashi tomonidan 2022-yil 14-aprelda qabul qilingan. 

22-fevral sanasida esa Xalqaro shaxmat federatsiyasi (FIDE) kengashi Rossiyaning ACFga o‘tish haqidagi qarorini ma’qullagandi. 

Rossiyalik shaxmatchilar Serbiyada bo‘lib o‘tadigan Yevropa chempionatida ishtirok etadi. Bu haqida RSHF prezidenti Andrey Filatov ma’lum qildi.

“Yuridik jihatdan biz 1-maydan ACF tarkibiga kiramiz. Shundan so‘ng kechiktirmasdan Osiyo musobaqalarida ishtirok etamiz. Yevropa chempionatida qatnashish? U yerda munosib natija ko‘rsatamiz deb umid qilaman”, — deydi Filatov.

Shaxmat bo‘yicha Yevropa chempionati 3-mart kuni start oladi.