Qoraqalpog‘iston Respublikasi va Namangan viloyatida pul evaziga tibbiyot muassasalariga ishga joylashtirib qo‘yishni vaʼda qilgan shaxslar ushlandi, deb xabar beradi Bosh prokuratura huzuridagi departamenti.
Ma’lum qilinishicha, departamentning To‘rtko‘l tuman bo‘limi tomonidan tezkor tadbir o‘tkazilgan. Tadbir davomida tuman tibbiyot birlashmasiga qarashli markaz bo‘limi bekasi B.A. fuqarolar X.N. va N.I.ning ishonchiga kirib, ularni go‘yoki yuqori lavozimda ishlovchi tanishlari yordamida 2,4 ming dollar evaziga ushbu tibbiyot birlashmasiga ishga joylashtirib qo‘yishni vaʼda qilgani aniqlangan. Ayol kelishilgan puldan 200 dollarini qo‘lga kiritib, qolgan 2,2 ming dollarni olgan vaqtida ashyoviy dalillar bilan ushlangan.
Shu kabi departament hamda DXXning Amudaryo tumani bo‘limlari tomonidan IIV xodimlari bilan hamkorlikda tezkor tadbir o‘tkazilgan. Unda tuman tibbiyot birlashmasiga qarashli tug‘uruqxona navbatchi akusheri Sh.X. fuqaro G.Y.ni go‘yoki yuqori lavozimda ishlovchi tanishlari yordamida ushbu tibbiyot birlashmasiga hamshira vazifasiga ishga joylashtirib qo‘yish evaziga 1,6 ming dollarni olgan vaqtida ashyoviy dalillar bilan qo‘lga olingan.
Departamentning Taxiatosh tuman bo‘limi tomonidan DXX va IIB xodimlari bilan hamkorlikda o‘tkazilgan tezkor tadbirda esa Ko‘z mikroxirurgiyasi markazi mintaqaviy filialiga qarashli maslahat poliklinikasi bekasi A.D. fuqaro N.N.ning ishonchiga kirib, uni go‘yoki yuqori lavozimda ishlovchi tanishlari yordamida Nukus shahridagi poliklinikaga hamshira vazifasiga ishga joylashtirib qo‘yish evaziga 10 million so‘mni olgan vaqtida ashyoviy dalillar bilan ushlangan.
Shuningdek, departamentning Uychi tuman bo‘limi tomonidan o‘tkazilgan tezkor tadbirda Namangan shahridagi oilaviy poliklinika hamshirasi N.R. fuqaro Yo.O‘.ni ushbu poliklinikaga ishga kiritib qo‘yish evaziga 700 dollarni olgan vaqtida ashyoviy dalillar bilan qo‘lga olingan.
Mazkur holatlar yuzasidan Jinoyat kodeksining 168-moddasi (firibgarlik) va 28, 211-moddasi (pora berish) bilan jinoyat ishlari qo‘zg‘atilib, tergov harakatlari o‘tkazilmoqda.
Izoh (0)