Қорақалпоғистон Республикаси ва Наманган вилоятида пул эвазига тиббиёт муассасаларига ишга жойлаштириб қўйишни ваъда қилган шахслар ушланди, деб хабар беради Бош прокуратура ҳузуридаги департаменти.
Маълум қилинишича, департаментнинг Тўрткўл туман бўлими томонидан тезкор тадбир ўтказилган. Тадбир давомида туман тиббиёт бирлашмасига қарашли марказ бўлими бекаси Б.А. фуқаролар Х.Н. ва Н.И.нинг ишончига кириб, уларни гўёки юқори лавозимда ишловчи танишлари ёрдамида 2,4 минг доллар эвазига ушбу тиббиёт бирлашмасига ишга жойлаштириб қўйишни ваъда қилгани аниқланган. Аёл келишилган пулдан 200 долларини қўлга киритиб, қолган 2,2 минг долларни олган вақтида ашёвий далиллар билан ушланган.
Шу каби департамент ҳамда ДХХнинг Амударё тумани бўлимлари томонидан ИИВ ходимлари билан ҳамкорликда тезкор тадбир ўтказилган. Унда туман тиббиёт бирлашмасига қарашли туғуруқхона навбатчи акушери Ш.Х. фуқаро Г.Й.ни гўёки юқори лавозимда ишловчи танишлари ёрдамида ушбу тиббиёт бирлашмасига ҳамшира вазифасига ишга жойлаштириб қўйиш эвазига 1,6 минг долларни олган вақтида ашёвий далиллар билан қўлга олинган.
Департаментнинг Тахиатош туман бўлими томонидан ДХХ ва ИИБ ходимлари билан ҳамкорликда ўтказилган тезкор тадбирда эса Кўз микрохирургияси маркази минтақавий филиалига қарашли маслаҳат поликлиникаси бекаси А.Д. фуқаро Н.Н.нинг ишончига кириб, уни гўёки юқори лавозимда ишловчи танишлари ёрдамида Нукус шаҳридаги поликлиникага ҳамшира вазифасига ишга жойлаштириб қўйиш эвазига 10 миллион сўмни олган вақтида ашёвий далиллар билан ушланган.
Шунингдек, департаментнинг Уйчи туман бўлими томонидан ўтказилган тезкор тадбирда Наманган шаҳридаги оилавий поликлиника ҳамшираси Н.Р. фуқаро Ё.Ў.ни ушбу поликлиникага ишга киритиб қўйиш эвазига 700 долларни олган вақтида ашёвий далиллар билан қўлга олинган.
Мазкур ҳолатлар юзасидан Жиноят кодексининг 168-моддаси (фирибгарлик) ва 28, 211-моддаси (пора бериш) билан жиноят ишлари қўзғатилиб, тергов ҳаракатлари ўтказилмоқда.
Изоҳ (0)