O‘zbekiston davlat nazorati organlari o‘rtasida yuqori xavf tug‘diradigan mahsulot haqida tezkor ravishda o‘zaro xabar berish tizimi yaratiladi va faoliyat ko‘rsatadi. Bu haqda “Texnik jihatdan tartibga solish to‘g‘risida”gi qonunda belgilandi.
Adliya vazirligi xabariga ko‘ra, 27-fevral kuni prezident tomonidan imzolangan qonunga ko‘ra, texnik jihatdan tartibga solish — mahsulotning xavfsizligiga, uni ishlab chiqarish jarayonlariga va usullariga doir talablarni belgilash, qo‘llash hamda bajarish, shuningdek, ularga rioya etilishini muvofiqlikni baholash va davlat nazoratini amalga oshirish orqali tekshirishdir.
O‘zbekiston texnik jihatdan tartibga solish agentligi texnik jihatdan tartibga solish sohasidagi maxsus vakolatli davlat organi hisoblanadi. Vazirlar Mahkamasi mazkur sohadagi vakolatli davlat boshqaruvi organlarini belgilaydi va ular faoliyatini muvofiqlashtiradi.
Qonunga muvofiq, texnik reglamentlar quyidagi maqsadlarda qabul qilinadi:
- mahsulot xavfsizligi talablarini belgilash orqali fuqarolarning hayotini yoki sog‘lig‘ini muhofaza qilish;
- atrof-muhitni, hayvonot va o‘simlik dunyosini muhofaza qilish;
- xaridorlarni (isteʼmolchilarni) chalg‘itadigan harakatlarning oldini olish;
- energiya jihatdan samaradorlikni va tabiiy resurslardan oqilona foydalanishni taʼminlash;
- savdodagi texnik to‘siqlarni bartaraf etish;
- ichki va tashqi bozorlarda mahsulotning raqobatbardoshliligini oshirish.
Texnik reglamentlarda belgilangan muvofiqlikni majburiy ravishda tasdiqlash quyidagi shakllarda amalga oshiriladi:
- muvofiqlikni deklaratsiya qilish;
- majburiy sertifikatlashtirish.
Qonun rasmiy eʼlon qilingan kundan eʼtiboran 6 oy o‘tgach kuchga kiradi.
“Texnik jihatdan tartibga solish to‘g‘risida”gi qonunning avvalgi tahriri 2009-yilning 24-aprelidan buyon amalda bo‘lib kelayotgandi.
2021-yil 2-iyunda “Texnik jihatdan tartibga solish sohasida davlat boshqaruvini tubdan takomillashtirish to‘g‘risida” prezident farmoni, “O‘zbekiston Respublikasi Investitsiyalar va tashqi savdo vazirligi huzuridagi O‘zbekiston texnik jihatdan tartibga solish agentligi faoliyatini tashkil etish chora-tadbirlari to‘g‘risida” prezident qarori imzolangandi.
Izoh (0)