Россия президенти матбуот котиби Дмитрий Песков АҚШ давлат котиби Энтони Блинкеннинг Қозоғистон ва Ўзбекистонга ташрифига муносабат билдирди. Бу ҳақда “ТАСС” хабар берди.
Песков Россия Марказий Осиё давлатлари билан фаол ҳамкорлик қилишини, бу давлатлар билан муносабатлар ташқи сиёсатнинг устувор йўналиши ҳисобланишини таъкидлади. Кремл расмийси Блинкеннинг Марказий Осиё мамлакатларига ташрифига батафсил изоҳ бермади.
“Мен АҚШ давлат котибининг ташрифлари ҳақида изоҳ беришни истамайман. Ахир мен президент матбуот котибиман. Бу менинг Ташқи ишлар вазирлигидаги ҳамкасбларимнинг ваколатига киради. Умуман олганда, бизнинг Марказий Осиё давлатлари билан ўзимизнинг икки томонлама муносабатларимиз бор, ўз ҳамкорлик форматларига эгамиз, уларнинг бир қатори билан бизни Евросиё иқтисодий ҳамжамияти бирлаштиради. Биз айнан шу нарсага эътибор қаратамиз, буни асосий манфаатимиз деб биламиз ва ташқи сиёсатдаги устувор вазифамиз деб ҳисоблаймиз”, — деди у.
Ҳозирда АҚШ давлат котиби Қозоғистон пойтахтига илк расмий ташриф билан келди ва у ерда Марказий Осиё давлатлари ташқи сиёсат идоралари раҳбарлари билан учрашади. Блинкен Қозоғистон президенти Қосим-Жўмарт Тўқаев билан ҳам учрашади. Қозоғистондан кейин АҚШ давлат котиби Тошкентга ташриф буюради.
Изоҳ (0)