Nokia yangi logotip taqdim qildi. Bunga odamlar kompaniyani hali ham mobil telefonlar yaratadi deb o‘ylagani sabab bo‘lgan

Finlyandiyaning 5G uskunalari ishlab chiqaruvchisi Nokia kompaniyasi o‘z logotipini odamlarning mobil telefonlar bilan bog‘lashiga yo‘l qo‘ymaslik uchun qayta ishlab chiqdi. Bu haqda Bloomberg xabar bermoqda.  

Nokia mobil telefonlar biznesini deyarli o‘n yil avval tark etgan edi. 

Yakshanba kuni e’lon qilingan brendning yangilanishi yangi strategik maqsadlar bilan birga taqdim qilindi. Kompaniya dunyo beshinchi avlod mobil texnologiyalarini tobora ko‘proq o‘zlashtirayotgani sababli tezroq o‘sishni ta’minlashga intilmoqda. 

“Ko‘pchilikning fikriga ko‘ra, biz hali ham uyali telefon brendimiz, ammo bunday emas. Biz tarmoqlar va sanoatni raqamlashtirishga katta e’tibor qaratadigan yangi brendni ishga tushirmoqchimiz, bu eski mobil telefonlardan butunlay farq qiladigan narsa”, — deydi bosh ijrochi direktor Pekka Lundmark yakshanba kuni Barselonadagi Jahon mobil kongressi oldidan bergan intervyusida. 

Nokia rusumidagi telefonlar hali ham HMD Global kompaniyasi tomonidan sotiladi. HMD litsenziyani 2014-yilda biznesni sotib olgan Microsoft korporatsiyasi bu nomdan foydalanishni to‘xtatgandan so‘ng olgan.