“Qirg‘izistonning barcha prezidentlari uchrashib, bir-birini kechirdi” — Sadir Japarov

Sadir Japarov Qirg‘izistonning barcha prezidentlarini bir joyga yig‘ib, uchrashuv o‘tkazganini ma’lum qildi. Prezident matbuot kotibi Erbol Sultanbayev bu ma’lumotni tasdiqlab, uchrashuv neytral hududda bo‘lib o‘tganini aytgan. Unda Asqar Akayev, Qurmanbek Bakiyev, Roza O‘tunboyeva, Almazbek Atambayev va So‘ronbay Jeenbekov ishtirok etgan. OAV xabarlariga ko‘ra, yig‘ilish Dubayda bo‘lib o‘tgan.

“Mamlakat kelajagi yo‘lidagi asosiy orzum ro‘yobga chiqdi — xalq hamjihatligi uchun avvalgi barcha prezidentlarni bir dasturxonga yig‘ib, uchrashuv o‘tkazdim”, — deya Japarovning so‘zlarini keltirmoqda Kaktus.media.

Sadir Japarovning ta’kidlashicha, globallashuv davrida ichki barqarorlik va milliy totuvlikka intilayotgan davlatlargina rivojlanib, qudratli davlatlarga aylanadi.

“O‘z vaqtida buyuk imperiya tuzib, Yevrosiyo makonida yashagan qadimgi qirg‘izlar oxir oqibat nimaga erishdi? Imperiya tarqoqlik va hokimiyat uchun o‘zaro kurashlar tufayli parchalandi. Natijada biz Markaziy Osiyoning bir burchagidan joy oldik. Ha, biz mustaqillikka egamiz, lekin ravnaq topishimizga nima to‘sqinlik qilmoqda? Agar kelishmovchiliklarni ortda qoldirilsa, bu masala, menimcha o‘z-o‘zidan yo‘q bo‘ladi”, — degan Japarov.

Uning aytishicha, hozir mamlakat shimol va janubga, viloyatlarga bo‘lingan, hamma faqat o‘zini o‘ylaydi. Bundan tashqari odamlar hali ham ma’lum bir prezident tarafdorlariga bo‘lingan. Qirg‘iziston kelajagi uchun barcha birlashib, bunday tarafkashlikka barham berish lozim, buning uchun esa avvalo prezidentlarning o‘zi birlashishi kerak.

“Bir paytlar xalq tomonidan saylanib so‘ng o‘z lavozimini tark etgan avvalgi prezidentlar bilan qo‘shma yig‘ilish o‘tkazilsa, bu xalqning jipslashishiga xizmat qiladi va eng katta tuhfa bo‘ladi, degan o‘y menga anchadan buyon tinchlik bermayotgandi. Nihoyat, qat’iyat bilan bu ezgu g‘oyani amalga oshirishga muvaffaq bo‘ldim”, — degan Sadir Japarov.

Uning qayd etishicha, sobiq prezidentlar o‘z e’tirozlari, alamlarini bildirdi, shu bilan birga xatolarini tan olib va bir-birini kechirdi.

“Mening maqsadim ham shu edi. Avvalgi prezidentlarning har birining tarafdorlari, har bir viloyat aholisi siyosat bilan shug‘ullanishni to‘xtatib, kelajak uchun iqtisodiyotni rivojlantirishga o‘tishini niyat qilaman”, — degan Qirg‘izistonning amaldagi prezidenti.