Qirg‘iziston sobiq prezidenti Asqar Akayevning aytishicha, Sadir Japarov tomonidan respublika sobiq prezidentlarining Dubaydagi uchrashuvi tashkil etilishi “tarixiy ahamiyatga ega misli ko‘rilmagan qadam” bo‘ldi.
Akayev Qirg‘izistonning amaldagi prezidenti Japarov va uning jamoasi davlat hamda jamiyat hayotining barcha jabhalarida, ichki va tashqi siyosatda katta muvaffaqiyatlarga erishganini qayd etdi.
“Men Japarovning tashabbusini qo‘llab-quvvatladim va hamkasblarni Qirg‘izistonning farovon kelajagi va qirg‘iz jamiyatida barqarorlikni mustahkamlash yo‘lida hamfikr bo‘lishga chaqirdim”, — deydi Akayev.
Uning qayd etishicha, Japarov o‘zidan oldingi rahbarlarga nisbatan yuzaga kelishi mumkin bo‘lgan noroziliklarni yumshatgan holda siyosiy donolik va insoniy saxiylik ko‘rsatgan.
“Qirg‘iziston xalqini hozirgi qulay vaziyatdan foydalanib, gullab-yashnagan Qirg‘izistonni barpo etishda iqtisodiy yuksalish uchun Japarov atrofida birlashishga chaqiraman”, — deb so‘zlarini yakunladi sobiq prezident.
18-fevral kuni Qirg‘izistonning amaldagi prezidenti Sadir Japarov Qirg‘izistonning barcha prezidentlarini bir joyga yig‘ib, uchrashuv o‘tkazganini ma’lum qilgandi. Unda Asqar Akayev, Qurmanbek Bakiyev, Roza O‘tunboyeva, Almazbek Atambayev va So‘ronbay Jeenbekov ishtirok etgan. Japarov sobiq prezidentlar o‘z e’tirozlari, alamlarini bildirgani, shu bilan birga, xatolarini tan olib, bir-birini kechirganini aytgandi.
Keyinroq respublika sobiq prezidenti Almazbek Atambayev ham uchrashuv tafsilotlari haqida gapirib, davradan xayrlashmay chiqib ketganini aytdi.