Qirg‘iziston sobiq prezidenti So‘ronbay Jeenbekov bir necha kunlik sukutdan so‘ng, amaldagi davlat rahbari Sadir Japarov boshchiligidagi Qirg‘izistonning sobiq prezidentlarining Dubaydagi uchrashuvi haqida fikr bildirdi. Bu haqda Kaktus Media xabar berdi.
Jeenbekov unga uchrashuv bo‘yicha savollar kelib tushayotganini aytib, bu haqida ochiqchasiga gapirmoqchiligini bildirdi.
“Dubayda bo‘lib o‘tgan uchrashuvni Qirg‘iziston prezidenti sifatida Sadir Japarov xalq birligini mustahkamlash maqsadida tashkil qilgan. U uchrashuvdan ko‘zlangan yagona maqsad mamlakatda totuvlikni mustahkamlash, Qirg‘izistonni kuchli davlat sifatida rivojlantirish, aholi turmushini yaxshilash ekanini aytdi. Davlat rahbari jamiyatning siyosatchilar tarafdorlariga bo‘linishini o‘tmishda qoldirishga chaqirdi. Biz bu ezgu tashabbusni, albatta, qabul qildik. Barcha ishtirokchilar yig‘ilish oxirigacha to‘liq ishtirok etdi va har birimiz qo‘llab-quvvatlashimizni bildirdik”, — dedi Jeenbekov.
Sobiq prezident Qirg‘iziston mustaqillikka erishgach, davlatda ham ijobiy, ham salbiy holatlar kuzatilganini qo‘shimcha qildi. U ro‘y bergan fojiali voqealar har bir Qirg‘iziston fuqarosiga qattiq ta’sir qilgani, shu sabab uchrashuvga ham hissiy, ham huquqiy baho berilganini aytdi.
“Bu bizda kuchli fuqarolik jamiyati va xalqning ichki erkinligi borligini yana bir bor isbotlaydi. Davlatimiz rahbari bu salohiyatni bunyodkorlik yo‘liga yo‘naltirishga chaqirdi”, — dedi u.
Avvalroq Qirg‘izistonning amaldagi prezidenti Sadir Japarov Qirg‘izistonning barcha prezidentlarini bir joyga yig‘ib, uchrashuv o‘tkazganini ma’lum qilgandi. Unda Asqar Akayev, Qurmanbek Bakiyev, Roza O‘tunboyeva, Almazbek Atambayev va So‘ronbay Jeenbekov ishtirok etgan. Japarov sobiq prezidentlar o‘z e’tirozlari, alamlarini bildirgani, shu bilan birga, xatolarini tan olib, bir-birini kechirganini aytgandi. Atambayev va Akayev uchrashuvga o‘z munosabatini bildirgan.
Izoh (0)