“Daryo” nashri 28-fevralda O‘zbekiston va jahonda sodir bo‘lgan eng muhim voqealarni e‘tiboringizga havola etadi.
Rossiya qanday vaziyatda G‘arb davlatlari bilan muzokaraga kirishib, hujum qurollarini tarqatmaslik shartnomasiga qaytadi?
Rossiya prezidentining matbuot kotibi Dmitriy Peskov “Izvestiya” nashriga intervyu berib, unda Rossiyaning G‘arb davlatlari rahbarlari bilan ehtimoliy muzokaralar va strategik hujum qurollari bo'yicha shartnomaga qaytish sharti haqida gapirdi.
Keling birinchi navbatda Kotibni hujum qurollarini tarqatmaslik bo'yicha shartnomaga qaytish sharti ochiqlanmasini ko'rib chiqsak:
Moskva ushbu shartnomada ishtirokini davom ettirishi uchun kollektiv G‘arb Rossiyaning xavfsizlik muammolariga munosabatini o‘zgartirishi va AQSH kollektiv G‘arbning yetakchisi sifatida bu boradagi siyosatini qayta ko‘rib chiqishi kerak.
Peskovning so‘zlariga ko‘ra, Rossiya prezidenti Vladimir Putin Rossiyaga u yoki bu tarzda o‘z maqsadlariga erishishga yordam beradigan har qanday muloqotga ochiq.
Matbuot kotibi bu muloqotlar “Tinchlik bilan — muzokaralar stolida yoki buning iloji bo‘lmagan taqdirda, hozir ko‘rib turganimizdek, harbiy yo‘l bilan” amalga oshirilishi mumkinligini ta’kidlagan.
Rossiya prezidenti matbuot kotibining aytishicha, Germaniya kansleri Olaf Shols va Fransiya prezidenti Emmanuel Makron “vaziyatdan chiqishning biror yo‘lini izlash uchun Putin bilan muloqotni davom ettirishini” bir necha bor taʼkidlagan. Biroq so‘nggi paytlarda ular tomonidan hech qanday tashabbus bo‘lmagan.
Biroq, matbuot kotibining ta’kidlashicha, muzokaralar faqat “maxsus harbiy operatsiya” maqsadlariga erishilgandan keyin muhokama qilinishi mumkin.
Gretsiya nima sababdan Turkiyalik qochqinlarni qabul qilmaydi?
Gretsiyaning migratsiya ishlari bo‘yicha vaziri Notis Mitarakis Turkiya bilan quruqlik va dengiz chegarasida nazoratni kuchaytirishga chaqirdi. Gretsiya hukumati Turkiya janubi-sharqida va Suriya shimolidagi dahshatli zilzilalardan so‘ng o‘z uylarini tark etgan qochqinlarning yangi to‘lqinini kutmoqda, deb xabar berdi The Guardian nashri.
“Millionlab odamlarning ommaviy ko‘chirilishi muammoning yechimi emas. Bu sodir bo‘lishidan oldin Turkiya va Suriyaga favqulodda yordam yuborilishi kerak”, — dedi Mitarakis.
Nashrning yozishicha, 2023-yil boshida Gretsiya hukumati Turkiya bilan Evros daryosi bo‘ylab butun chegarada to‘siq qurishga qaror qilgan. Chegarada to‘siq qurilishi 2020-yilda, Gretsiya—Turkiya chegarasidagi vaziyat keskinlashganidan keyin boshlangan. 2022-yilda esa Gretsiya chegara nazorati Turkiyadan 256 ming muhojirning mamlakatga noqonuniy kirishini to‘xtatib qoldi.
O‘tgan haftada Yevropa chegaralarini boshqarish bo‘yicha konferensiyada Mitarakis quruqlikdagi chegara bo‘ylab bahsli to‘siqni kengaytirishni davom ettirishiga va’da berdi. Uning so'zlariga ko'ra, “To‘siq Evros daryosining butun uzunligi bo‘ylab cho‘ziladi.
Turkiya va Suriyadagi zilzilalardan keyin Yevropaga borishga harakat qilayotgan qochqinlar nafaqat Gretsiya, balki Italiyaga ham yo‘l olmoqda. 26-fevral kuni Italiyaning Kalabriya qirg‘oqlari yaqinida kema qoyalarga urilishi oqibatida 59 nafar qochqin, jumladan, 12 nafar bola halok bo‘ldi. Omon qolganlarning so‘zlariga ko‘ra, Turkiyadan jo‘nab ketgan kema bortida 150 nafargacha odam bo‘lgan.
AQSH davlat kotibi Qozog‘istonga keldi
AQSH davlat kotibi Entoni Blinken Ostonaga tashrif buyurib, mamlakat prezidenti Qosim-Jo‘mart To‘qayev bilan uchrashdi. Bu haqda AQSH davlat departamenti xabar berdi.
To‘qayev diplomatik munosabatlar o‘rnatilganidan buyon Qozog‘iston va AQSH o‘rtasida ham ikki tomonlama, ham ko‘p tomonlama hamkorlik yo‘lga qo‘yilganini ta’kidladi.
“Xavfsizlik, energetika, savdo kabi ko‘plab strategik sohalarda ishonchli hamkorlik aloqalarini o‘rnatdik”, — deydi Qozog‘iston prezidenti.
Bunga javoban Entoni Blinken Ostonada ekanidan mamnunligini bildirib hamkorlikni so'nggi ikki yillikdagi muhim qadamlarini ta'kidladi.
Qozog‘iston rahbari AQSHning C5+1 formatida hamkorlikni kengaytirishga harakatlarini ma’qullab, Ostona shahrida Markaziy Osiyo davlatlari va AQSH tashqi ishlar idoralari rahbarlarining uchrashuvini o‘tkazish muhimligini qayd etgan.
O‘zbekiston qonunchiligida 1-martdan kuchga kiradigan o‘zgarishlar bilan tanishamiz:
Xususan 1-martdan e‘tiboran, elektr va gaz iste’moli bo‘yicha huquqbuzarliklar elektron rasmiylashtiriladi.
Unga ko‘ra, elektr energiyasi va tabiiy gazdan foydalanish qoidalarini buzish bilan bog‘liq huquqbuzarlik bo‘yicha tuzilgan dalolatnomalarni elektron shaklda rasmiylashtirish va tegishli ma’lumotlarni “E-ma’muriy ish” tizimiga kiritish tartibi joriy etiladi.
Bundan tashqari davlat xaridlari bo‘yicha cheklovlar o‘rnatilmoqda, qolaversa endilikda, soliq tekshiruvlari ustidan sudga shikoyat kiritish mumkin bo‘ladi.
Qimmatli qog‘ozlar haqida maʼlumotlar OAVda e’lon qilinadi
Iqtisodiyot va moliya vazirligi ikki kunlik muddatda OAV va (yoki) o‘zining saytida quyidagi ma’lumotlarni e’lon qiladi:
-qimmatli qog‘ozlar chiqarilishini davlat ro‘yxatidan o‘tkazish, uni to‘xtatib turish, amalga oshmagan yoki haqiqiy emas deb topish;
-qimmatli qog‘ozlar bozorida professional faoliyatni amalga oshirish uchun litsenziya berish, uning amal qilishini to‘xtatib turish yoki tugatish, litsenziyani bekor qilish;
Ertadan boshlab kuchga kiradigan o‘zgarishlarning yanada batafsil ro‘yxati bilan quyidagi havola orqali tanishishingiz mumkin.
Izoh (0)