“Дарё” нашри 28 февралда Ўзбекистон ва жаҳонда содир бўлган энг муҳим воқеаларни эътиборингизга ҳавола этади.
Россия қандай вазиятда Ғарб давлатлари билан музокарага киришиб, ҳужум қуролларини тарқатмаслик шартномасига қайтади?
Россия президентининг матбуот котиби Дмитрий Песков “Известия” нашрига интервью бериб, унда Россиянинг Ғарб давлатлари раҳбарлари билан эҳтимолий музокаралар ва стратегик ҳужум қуроллари бўйича шартномага қайтиш шарти ҳақида гапирди.
Келинг биринчи навбатда Котибни ҳужум қуролларини тарқатмаслик бўйича шартномага қайтиш шарти очиқланмасини кўриб чиқсак:
Москва ушбу шартномада иштирокини давом эттириши учун коллектив Ғарб Россиянинг хавфсизлик муаммоларига муносабатини ўзгартириши ва АҚШ коллектив Ғарбнинг етакчиси сифатида бу борадаги сиёсатини қайта кўриб чиқиши керак.
Песковнинг сўзларига кўра, Россия президенти Владимир Путин Россияга у ёки бу тарзда ўз мақсадларига эришишга ёрдам берадиган ҳар қандай мулоқотга очиқ.
Матбуот котиби бу мулоқотлар “Тинчлик билан — музокаралар столида ёки бунинг иложи бўлмаган тақдирда, ҳозир кўриб турганимиздек, ҳарбий йўл билан” амалга оширилиши мумкинлигини таъкидлаган.
Россия президенти матбуот котибининг айтишича, Германия канцлери Олаф Шольц ва Франция президенти Эммануэл Макрон “вазиятдан чиқишнинг бирор йўлини излаш учун Путин билан мулоқотни давом эттиришини” бир неча бор таъкидлаган. Бироқ сўнгги пайтларда улар томонидан ҳеч қандай ташаббус бўлмаган.
Бироқ матбуот котибининг таъкидлашича, музокаралар фақат “махсус ҳарбий операция” мақсадларига эришилгандан кейин муҳокама қилиниши мумкин.
Греция нима сабабдан Туркиялик қочқинларни қабул қилмайди?
Грециянинг миграция ишлари бўйича вазири Нотис Митаракис Туркия билан қуруқлик ва денгиз чегарасида назоратни кучайтиришга чақирди. Греция ҳукумати Туркия жануби-шарқида ва Сурия шимолидаги даҳшатли зилзилалардан сўнг ўз уйларини тарк этган қочқинларнинг янги тўлқинини кутмоқда, деб хабар берди The Guardian нашри.
“Миллионлаб одамларнинг оммавий кўчирилиши муаммонинг ечими эмас. Бу содир бўлишидан олдин Туркия ва Сурияга фавқулодда ёрдам юборилиши керак”, — деди Митаракис.
Нашрнинг ёзишича, 2023 йил бошида Греция ҳукумати Туркия билан Эврос дарёси бўйлаб бутун чегарада тўсиқ қуришга қарор қилган. Чегарада тўсиқ қурилиши 2020 йилда, Греция—Туркия чегарасидаги вазият кескинлашганидан кейин бошланган. 2022 йилда эса Греция чегара назорати Туркиядан 256 минг муҳожирнинг мамлакатга ноқонуний киришини тўхтатиб қолди.
Ўтган ҳафтада Европа чегараларини бошқариш бўйича конференцияда Митаракис қуруқликдаги чегара бўйлаб баҳсли тўсиқни кенгайтиришни давом эттиришига ваъда берди. Унинг сўзларига кўра, “Тўсиқ Эврос дарёсининг бутун узунлиги бўйлаб чўзилади.
Туркия ва Суриядаги зилзилалардан кейин Европага боришга ҳаракат қилаётган қочқинлар нафақат Греция, балки Италияга ҳам йўл олмоқда. 26 февраль куни Италиянинг Калабрия қирғоқлари яқинида кема қояларга урилиши оқибатида 59 нафар қочқин, жумладан, 12 нафар бола ҳалок бўлди. Омон қолганларнинг сўзларига кўра, Туркиядан жўнаб кетган кема бортида 150 нафаргача одам бўлган.
АҚШ давлат котиби Қозоғистонга келди
АҚШ давлат котиби Энтони Блинкен Остонага ташриф буюриб, мамлакат президенти Қосим-Жўмарт Тўқаев билан учрашди. Бу ҳақда АҚШ давлат департаменти хабар берди.
Тўқаев дипломатик муносабатлар ўрнатилганидан буён Қозоғистон ва АҚШ ўртасида ҳам икки томонлама, ҳам кўп томонлама ҳамкорлик йўлга қўйилганини таъкидлади.
“Хавфсизлик, энергетика, савдо каби кўплаб стратегик соҳаларда ишончли ҳамкорлик алоқаларини ўрнатдик”, — дейди Қозоғистон президенти.
Бунга жавобан Энтони Блинкен Остонада эканидан мамнунлигини билдириб ҳамкорликни сўнгги икки йилликдаги муҳим қадамларини таъкидлади.
Қозоғистон раҳбари АҚШнинг C5+1 форматида ҳамкорликни кенгайтиришга ҳаракатларини маъқуллаб, Остона шаҳрида Марказий Осиё давлатлари ва АҚШ ташқи ишлар идоралари раҳбарларининг учрашувини ўтказиш муҳимлигини қайд этган.
Ўзбекистон қонунчилигида 1 мартдан кучга кирадиган ўзгаришлар билан танишамиз:
Хусусан 1 мартдан эътиборан, электр ва газ истеъмоли бўйича ҳуқуқбузарликлар электрон расмийлаштирилади.
Унга кўра, электр энергияси ва табиий газдан фойдаланиш қоидаларини бузиш билан боғлиқ ҳуқуқбузарлик бўйича тузилган далолатномаларни электрон шаклда расмийлаштириш ва тегишли маълумотларни “Э-маъмурий иш” тизимига киритиш тартиби жорий этилади.
Бундан ташқари давлат харидлари бўйича чекловлар ўрнатилмоқда, қолаверса эндиликда, солиқ текширувлари устидан судга шикоят киритиш мумкин бўлади.
Қимматли қоғозлар ҳақида маълумотлар ОАВда эълон қилинади
Иқтисодиёт ва молия вазирлиги икки кунлик муддатда ОАВ ва (ёки) ўзининг сайтида қуйидаги маълумотларни эълон қилади:
-қимматли қоғозлар чиқарилишини давлат рўйхатидан ўтказиш, уни тўхтатиб туриш, амалга ошмаган ёки ҳақиқий эмас деб топиш;
-қимматли қоғозлар бозорида профессионал фаолиятни амалга ошириш учун лицензия бериш, унинг амал қилишини тўхтатиб туриш ёки тугатиш, лицензияни бекор қилиш;
Эртадан бошлаб кучга кирадиган ўзгаришларнинг янада батафсил рўйхати билан қуйидаги ҳавола орқали танишишингиз мумкин.
Изоҳ (0)