BMT: Yamanning 21 milliondan ortiq aholisi gumanitar yordamga muhtoj
Birlashgan Millatlar Tashkiloti matbuot xizmati ma’lumotlariga ko‘ra, Yamanda gumanitar ehtiyojlar ortib bormoqda, chunki mamlakat aholisining uchdan ikki qismini tashkil qiluvchi 21 milliondan ortiq odam yordam va himoyaga muhtoj.
Gumanitar tashkilotlar dunyo hamjamiyatidan 2023-yilda 17,3 million yamanlikka yordam berish uchun 4,3 milliard dollar ajratilishiga umid qilmoqda.
“Dushanba (27-fevral) kuni Jenevada Yamanni qo‘llab-quvvatlash uchun mablag‘ yig‘ish maqsadida xalqaro donorlar konferensiyasi bo‘lib o‘tdi. Urushdan vayronaga aylangan mamlakatdagi 17,3 million kishini himoya qilish uchun yordam so‘rovi 4,3 milliard dollarni tashkil etmoqda. Bugungi kunga kelib, Yamandagi gumanitar inqiroz dunyodagi eng og‘ir inqirozlardan biri bo‘lib qolmoqda”, — deyiladi xabarda.
O‘tgan yili olti oylik sulhga qaramay, Yaman xalqi, asosan, iqtisodning yomonlashuvi va hayotni ta’minlash tizimlarining vayron bo‘lishi tufayli azoblanishda davom etmoqda.
“Xalqaro hamjamiyat bu inqirozni tugatish uchun kuch va vositalarga ega. Bu bizning insonparvarlik murojaatimizni to‘liq moliyalashtirishni talab qiladi”, — dedi BMT bosh kotibi Antoniu Guterrish.
Yaman xalqi qariyb sakkiz yildan buyon Saudiya Arabistoni qo‘llab-quvvatlagan hukumat kuchlari va “Ansorulloh” (husiylar) isyonchi guruhi o‘rtasidagi janglar oqibatlaridan aziyat chekmoqda. Kuchli qurg‘oqchilik va suv toshqinlari ham odamlar hayoti, xavfsizligi va farovonligiga tahdid solmoqda.
Bundan tashqari, Yaman urush davom etayotgan boshqa mamlakatlardan, asosan Somali va Efiopiyadan 100 mingga yaqin qochqin va boshpana izlovchilarni qabul qilgan.
Bosh kotibning gumanitar masalalar bo‘yicha o‘rinbosari va BMTning favqulodda vaziyatlarda yordam ko‘rsatish bo‘yicha koordinatori Martin Griffits mablag‘ yig‘ish konferensiyasi muhimligini ta’kidladi.
“Bu tinchlikka eltuvchi yo‘lni topish uchun sa’y-harakatlarni davom ettirish va hatto ikki baravar oshirishni anglatadi”, — dedi u.
Mablag‘ yig‘ish konferensiyasi BMT bosh kotibi hamda Shvetsiya va Shveysariya hukumatlari tomonidan birgalikda o‘tkazilgan.
“Yaman xalqini qo‘llab-quvvatlash hozir har qachongidan ham muhimroq”, — dedi Shveysariya Federal Tashqi ishlar departamenti rahbari Iynatsio Kassis.
Shvetsiya xalqaro hamkorlik va tashqi savdo vaziri Yoxan Forssel uning hukumati global gumanitar masalalarda hamkorlikka sodiqligini taʼkidladi.
