Afg‘onistonda “Tolibon” hukumati sobiq xorijiy harbiy bazalarning bir qismini maxsus iqtisodiy zonalarga aylantirishni rejalashtirmoqda. Bu haqda BBC va Reuters xabar berdi.
Afg‘onistondagi iqtisodiy vaziyat “Tolibon” 2021-yilning avgustida mamlakatda hokimiyatni qo‘lga olganidan keyin yomonlasha boshladi. Buning asosiy sabablaridan biri Afg‘onistonga 2000-yillarning boshidan beri yordam berib kelayotgan asosiy donor davlatlarning “Tolibon” bilan hamkorlik qilishdan bosh tortish edi. Shuningdek, xalqaro tashkilotlarning aksariyati mamlakatdagi faoliyatini to‘xtatdi.
Afg‘oniston bosh vazirining iqtisodiy masalalar bo‘yicha o‘rinbosari Mulla Abdul G‘ani Baradar 20 yildan beri xorijiy kontingentlar joylashgan bir qator sobiq harbiy bazalarni o‘zgartirish rejalarini ma’lum qildi.
“Afg‘oniston Sanoat va savdo vazirligi xorijiy kuchlarning ayrim harbiy bazalarini maxsus iqtisodiy zonalarga aylantirish uchun ularni bosqichma-bosqich nazoratga olishi kerak, degan qaror qabul qilindi”, — dedi Baradar.
U loyiha poytaxt Kobul va shimoliy Balx viloyatidagi bazalardan boshlanishini qo‘shimcha qildi, biroq tafsilotlarni keltirmadi.
Mutaxassislarning fikricha, Afg‘onistonda 1 trillion dollardan ortiq tabiiy resurslar, jumladan, tabiiy gaz, mis va noyob yer jinslari mavjud. Biroq bu zaxiralarning aksariyatidan mamlakatda o‘nlab yillar davom etgan beqarorlik tufayli foydalanilmayapti.
Avvalroq “Tolibon” Afg‘oniston shimolida neft quduqlarini burg‘ulash bo‘yicha Xitoy firmasi bilan shartnoma imzolashni rejalashtirayotganini ma’lum qilgandi. 25 yillik shartnoma Xitoyning mintaqadagi iqtisodiy ishtirokini nazarda tutadi.
Pekin boshqa barcha davlatlar singari “Tolibon” hukumatini rasman tan olmagan, biroq Xitoyning “Bir kamar, bir yo‘l” tashabbusi uchun muhim mintaqaning markazida joylashgan Afg‘onistonda uning asosiy manfaatlari yotibdi.
2013-yilda Si Szinpin tomonidan boshlangan tashabbus rivojlanayotgan mamlakatlarga portlar, yo‘llar va ko‘priklar kabi infratuzilmani qurish uchun mablag‘ ajratadi.
Izoh (0)