Афғонистоннинг Теҳрондаги элчихонаси Кобулда бир ярим йилдан буён ҳокимиятни назорат қилиб келаётган “Толибон”га расман топширилди. “Толибон” вакиллари элчихонада 27 февралдан ишлай бошлаган, деб хабар бермоқда TOLOnews телеканали.
Афғонистоннинг аввалги ҳукумати томонидан тайинланган дипломатик миссия аъзолари элчихонани тарк этган.
“Толибон” етти нафар ходимни Теҳронга элчихонада ишлаш учун юборган. Уларга Фазл Муҳаммад Ҳаққоний бошчилик қилмоқда. У элчи мақомига эга эмас, чунки Эрон “Толибон” ҳукуматини тан олмаган. Шу сабабдан унинг лавозими “Афғонистон дипломатик миссиясининг муваққат ишлар вакили” деб аталади.
Эрон ташқи ишлар вазирлиги Афғонистон элчихонаси ходимларининг алмаштирилишига Эрон расмийларининг алоқаси йўқлигини айтди ва буни Афғонистоннинг ички муаммоси деб атади.
Бундан ташқари, TOLOnews агентлиги Афғонистон ТИВ вакилига таяниб, Афғонистоннинг Истанбулдаги консулхонаси ҳам “Толибон” назоратига ўтганини хабар қилди.
“Толибон” 2021 йилнинг август ойидан бери Афғонистонда назорат ўрнатганига қарамай, уларнинг ҳукуматини дунёнинг ҳеч бир давлати тан олмаган. Бироқ аввалроқ Афғонистоннинг Россия, Хитой, Туркманистон ва Покистондаги элчихоналарида ҳаракат вакиллари иш бошлаган эди.
Изоҳ (0)