Toshkent shahrida ikki yigit telefon aksessuarlari bilan savdo qiluvchi do‘konlardan birini o‘marishga urindi, deb xabar beradi poytaxt IIBB axborot xizmati.
Qayd etilishicha, mazkur hodisa Chorsu bozori yaqinida ro‘y bergan. Yuzlariga niqob taqib olgan ikki kishi pichoq bilan qurollangan holda do‘konga bostirib kirib, uning sotuvchisidan pul talab qilgan. Shu vaqt do‘konga xaridor kirib qolgani bois, gumonlanuvchilar voqea joyidan yashirinishga majbur bo‘lgan.
“O‘. telefon qilib, qarzga pul so‘radi. Bu vaqtda o‘zimga ham pul kerak edi, shuning uchun undan menga yordam berishini so‘radim. Shu kuni Chorsu bozori oldida ko‘rishdik, pichoq, niqoblar va qo‘lqoplar sotib oldik”, — deydi qo‘lga olingan shaxslardan biri.
Gumonlanuvchilar kuzatuv kameralari yordamida qo‘lga olingan bo‘lib, ulardan biri Toshkentdagi OTMlarning birida 1-bosqichda o‘qiydi.
Holat yuzasidan Jinoyat kodeksining 164-modda (bosqinchilik) 3-qismi bilan jinoyat ishi qo‘zg‘atilgan.
Izoh (0)