Qoraqalpog‘istonning To‘rtko‘l tumanida 24-fevral kuni kanalda suv bosimi ortishi oqibatida uylarni suv bosgani xabar qilingandi. Qoraqalpog‘iston prokuraturasi holat bo‘yicha qator mansabdorlarga jinoyat ishi qo‘zg‘atilganini ma’lum qildi.
Toshqin oqibatida shu hududda yashovchi 7 nafar fuqaroning yashash uyi va yordamchi xo‘jalik inshootlariga zarar yetgan. Hodisa oqibatida hech kim jarohatlanmagan. Favqulodda vaziyatlar vazirligi 24-fevral soat 07:00 ga qadar suv toshishini bartaraf etib, to‘planib qolgan suvdan hovli yer maydonlari tozalangan.
Hodisa joyiga Qoraqalpog‘iston Jo‘qorg‘i Kengesi, Vazirlar Kengashi hamda respublika prokuraturasi mas’ullari yetib borgan. Ular vaziyatni o‘rganib, suv toshqini oqibatlarini bartaraf etish bo‘yicha hududiy sektor rahbarlari hamda boshqa mas’ullarga tegishli topshiriqlar bergan.
Holat yuzasidan shu kunning o‘zida To‘rtko‘l tuman prokuraturasi tomonidan “Paxta Arna Nayman” irrigatsiya tarmoqlari boshqarmasi va To‘rtko‘l tuman Irrigatsiya bo‘limi mansabdor shaxslari hamda boshqalarga nisbatan Jinoyat kodeksining 203-moddasi (Suv yoki suv havzalaridan foydalanish shartlarini buzish), 207-moddasi (Mansabga sovuqqonlik bilan qarash) va 229-moddasi (O‘zboshimchalik) bilan jinoyat ishi qo‘zg‘atilgan.
Jinoyat ishi doirasida fuqarolarga yetkazilgan zararni aniqlash bo‘yicha ekspertiza tayinlangan. Hozirda hodisa aybdorlarini aniqlashga qaratilgan tergov harakatlari olib borilmoqda, natijasiga ko‘ra qonuniy qaror qabul qilinishi ta’minlanadi.
Izoh (0)