Toshkentda o‘zgalar “dacha”si orqali firibgarlik qilganlar ushlandi

Toshkentda o‘zgalar “dacha”si orqali firibgarlik qilgan uch kishi ushlandi. Bu haqda IIV Kiberxavfsizlik markazi xabar berdi.

Ma’lum qilinishicha, poytaxtning Yunusobod tumanida yashovchi R.A. ariza bilan murojaat qilib, OLX platformasida “Dacha Chimgan” eʼlonini joylagan nomaʼlum shaxs bilan Telegram’da dala hovli ijarasi yuzasidan kelishuv amalga oshirib, uning bank kartasiga 700 ming so‘m oldindan to‘lov o‘tkazib bergani, ammo ko‘rsatilgan manzilga yetib kelganida nomaʼlum shaxs bilan bog‘lanib bo‘lmaganidan keyin firibgarlik qurboni bo‘lganini tushunib yetganini maʼlum qilib, firibgarlarga nisbatan qonuniy chora ko‘rishni so‘ragan.

Olib borilgan tezkor-qidiruv tadbirlar davomida firibgarlik Yunusobod tumanida yashovchi, 1999-yilda tug‘ilgan F.D. tomonidan sodir etilgani aniqlangan.

F.D. internetdagi turli eʼlon platformalarida “Dacha Chimgan” deb nomlanuvchi eʼlonlar joylashtirib, turli bahonalar orqali yana bir nechta fuqarolar pullarini firibgarlik yo‘li bilan o‘zlashtirib, o‘z shaxsiy ehtiyoji uchun ishlatib yuborgan.

Shuningdek, shu turdagi jinoyatlarni amalga oshirgan 2001-yilda tug‘ilgan. S.S. va 1998-yilda tug‘ilgan E.X. ham qo‘lga olinib, ularga nisbatan Jinoyat kodeksining 168-moddasi (firibgarlik) 3-qismi bilan jinoyat ishi qo‘zg‘atilib, dastlabki tergov harakatlari olib borilmoqda.