O‘zbekiston va Pokiston Markaziy va Janubiy Osiyoni Afg‘oniston orqali bog‘laydigan va Pokiston portlariga olib chiqadigan temiryo‘l qurilishi loyihasini tezlashtirishga kelishdi. Bu haqda Investitsiyalar, sanoat va savdo vazirligi xabar qildi.
Ma’lum qilinishicha, Pokiston delegatsiyasining tashrifi davomida Toshkentda investitsiyalar, sanoat va savdo vaziri Laziz Kudratovning Pokiston moliya vaziri Is’hoq Dor bilan tor doiradagi uchrashuvi bo‘lib o‘tdi.
Uchrashuvda transafg‘on temiryo‘lini qurish loyihasining hayotga tatbiq etilishini tezlashtirish bo‘yicha ham kelishuvga erishildi. Bundan tashqari, kelishilgan chora-tadbirlar qatorida multimodal yuk tashish hajmini oshirish, mahsulotlarni uchinchi davlatlar bozorlariga birgalikda eksport qilish maqsadida har ikki davlat hududlarida terminallar yaratish masalalari ham o‘rin oldi.
Shuningdek, transport va logistika, o‘zaro tovar aylanmasi, sarmoyaviy va sanoat kooperatsiyasi, bank ishi kabi ustuvor yo‘nalishlarda ikki tomonlama hamkorlikni rivojlantirish istiqbollari muhokama qilindi.
2022-yilda 240 million dollarga yetgan O‘zbekiston—Pokiston o‘zaro savdo hajmini yanada oshirish bo‘yicha navbatdagi chora-tadbirlar ko‘rib chiqildi. Tomonlar ikki tomonlama tovar ayirboshlash hajmini ko‘paytirish uchun zarur shart-sharoitlar yaratish maqsadida Imtiyozli savdo to‘g‘risidagi bitimni amalda joriy etish va transport yo‘laklarini diversifikatsiya qilishni jadallashtirish bo‘yicha aniq chora-tadbirlar qabul qilinishini qo‘llab-quvvatladi.
Shuningdek, ikki mamlakat moliya institutlari o‘rtasida vakillik bank munosabatlarini rivojlantirish bo‘yicha chora-tadbirlar ko‘rishga kelishildi.
Ma'lumot uchun, Termiz—Mozori Sharif—Kobul—Peshovar transafg‘on temiryo‘li loyihasining taxminiy qiymati 5 milliard dollarni tashkil etadi. Uzunligi 600 kilometr bo‘lgan temir yo‘l Markaziy Osiyo mamlakatlari uchun Pokistonning yirik dengiz portlariga chiqish yo‘lini ochib beradi. Bu esa mintaqaviy aloqa va savdoni rivojlantirishga xizmat qiladi.
Shavkat Mirziyoyev ushbu transafg‘on temiryo‘lini asr loyihasi deb atagan. Temiryo‘l qurilishi 2022-yilning sentabr oyida boshlanishi rejalashtirilgandi. Biroq rejalar o‘zgarishi sabab bu amalga oshmadi.
Izoh (0)