Farg‘ona viloyatining Beshariq tumanida tavakkalchilikka asoslangan o‘yin tashkil etgan shaxsga jinoyat ishi qo‘zg‘atildi. Bu haqda viloyat IIB matbuot xizmati xabar berdi.
20-fevral kuni tuman IIB JQB xodimlari tomonidan o‘tkazilgan tezkor tadbir davomida X.Y muqaddam Ma’muriy javobgarlik to‘g‘risidagi kodeksning 191-moddasi 3-qismi (qimor va tavakkalchilikka asoslangan boshqa o‘yinlarni tashkil etish yoki o‘tkazish uchun telekommunikatsiya tarmoqlarida, shu jumladan, Internet jahon axborot tarmog‘i provayderlari tomonidan xizmatlar ko‘rsatish yoki xizmatlar ko‘rsatishga ko‘maklashish, tegishli dasturiy ta’minotdan nusxa ko‘paytirish, uni ko‘paytirish, tarqatish) bilan javobgarlikka tortilganiga qaramay, 1XBet bukmekerlik kompaniyasi va MobCash ilovasini telefon apparatiga yuklab olib, tavakkalchilikka asoslangan o‘yinlarni tashkil etish va o‘tkazish uchun moddiy manfaat evaziga internet jahon axborot tarmog‘i provayderi tomonidan pul o‘tkazish xizmati bilan shug‘ullanib kelgani aniqlangan.
18—19-fevral kunlari u 1XBet bukmekerlik kompaniyasi ilovasi va MobCash ilovasi yordamida fuqarolar D.A hisob raqamiga 300 ming so‘m, X.M hisob raqamiga 135 ming so‘m pullarini o‘tkazgan.
Mazkur holat yuzasidan Beshariq tumani IIB huzuridagi tergov bo‘linmasi tomonidan Jinoyat kodeksining 278-moddasi 4-qismi (qimor va tavakkalchilikka asoslangan boshqa o‘yinlarni tashkil etish hamda o‘tkazish) bilan jinoyat ishi qo‘zg‘atilib, tergov harakatlari olib borilmoqda.
Izoh (0)