16-yanvar kuni O‘zbekistonning Kuala-Lumpurdagi elchixonasi ko‘magida O‘zbekiston va Bruney transport vazirliklari hamda Uzbekistan Airports AJ, Marokanda Air va Royal Brunei Airlines aviakompaniyalari rahbarlari o‘rtasida onlayn uchrashuv bo‘lib o‘tdi, deb xabar bermoqda “Dunyo” axborot agentligi.
Qayd etilishicha, 1974-yilda tashkil etilgan Royal Brunei Airlines Bruney sultonligining davlatga qarashli milliy aviakompaniyasi hisoblanadi. Bugungi kunda kompaniya Janubi-Sharqiy Osiyo, Yaqin Sharq, Yevropa, Avstraliya va Okeaniyaning 20 yo‘nalishi bo‘ylab muntazam parvozlarni amalga oshirmoqda.
Muzokaralar chog‘ida Uzbekistan Airports AJ faoliyati, xorijiy aviakompaniyalarga boshqa davlatlardan yo‘lovchi va yuk qatnovlarini tashkil etishda mavjud imtiyoz va preferensiyalar, shuningdek, Samarqand xalqaro aeroportida joriy etilgan “Ochiq osmon” rejimi haqida batafsil ma’lumotlar taqdim etilgan.
Hamkorlikni yo‘lga qo‘yish masalalari, xususan, Royal Brunei Airlines aviakompaniyasining O‘zbekistonga to‘g‘ridan to‘g‘ri havo qatnovlarini amalga oshirish istiqbollari muhokama qilingan.
Royal Brunei Airlines aviakompaniyasi vitse-prezidenti Ilyas Rori Teo mamlakat aeroportlarini modernizatsiya qilish, sayyohlar uchun qulay shart-sharoitlar yaratish bo‘yicha respublikada ko‘rilayotgan chora-tadbirlarni yuqori baholab, o‘zbekistonlik hamkorlar bilan aloqalarni yo‘lga qo‘yishdan manfaatdor ekanini ta’kidlagan.
Birinchi qadam sifatida O‘zbekiston va Malayziya hukumatlari o‘rtasida havo qatnovi to‘g‘risidagi bitimni ishlab chiqish va imzolash orqali hamkorlikning huquqiy asoslarini yaratish taklif etilgan. Ikki davlat bozorlarini o‘zaro o‘rganish maqsadida respublika aviakompaniyalari bilan kod-sher yoki interlayn kelishuv asosida o‘zaro hamkorlik qilish imkoniyati qayd etilgan.
Bruney Transport va axborot kommunikatsiyalari vazirligining Aviatsiyani rivojlantirish departamenti boshlig‘i Laylatul Zurayda ham ikki davlat aviatsiya ma’muriyati va aeroportlarining salohiyatini mustahkamlash, shuningdek, ziyorat turizmi, xususan “Umra +” dasturi doirasida hamkorlikni yo‘lga qo‘yishni taklif qilgan.
Uchrashuv yakunlari bo‘yicha hamkorlik istiqbollarini batafsil muhokama qilish, aeroportlar hamda sayyohlik obyektlari infratuzilmasi bilan tanishish uchun Bruney Transport va infokommunikatsiya vazirligi hamda Royal Brunei Airlines aviakompaniyasi vakillarining O‘zbekistonga safarini tashkil etish bo‘yicha kelishuvga erishilgan.
Izoh (0)