Ўзбекистоннинг Хитойдаги Бош консуллиги ходимлари China Southern Airlines авиакомпанияси бош директорининг ўринбосари Сиао Ёнг билан музокара ўтказди. Бу ҳақда “Дунё” агентлиги хабар берди.
Қайд этилишича, мулоқот чоғида Хитой компанияси вакилига Ўзбекистоннинг сайёҳлик салоҳияти ва икки давлат ўртасида мавжуд савдо алоқалари ҳақидаги батафсил маълумотлар тақдим этилгани баробаридаги сайёҳлик йўналишида ҳамкорлик, янги авиақатновларни йўлга қўйиш масалалари атрофлича муҳокама қилинган.
Икки томонлама савдо-иқтисодий алоқаларни янада ривожлантириш, туризм йўналишида ҳамкорликни чуқурлаштириш ва Жанубий Хитойдан сайёҳлар оқимини кўпайтиришга хизмат қиладиган Гуанчжоу—Тошкент—Гуанчжоу ва Гуанчжоу—Самарқанд—Гуанчжоу йўналишларида ҳаво қатновларини амалга ошириш таклифи билдирилган.
China Southern Airlines компанияси бош директорининг ўринбосари Сиао Ёнг компания ҳозирги кунда Урумчи—Тошкент—Урумчи йўналишида парвозларни йўлга қўйганини ҳамда 2023 йил ёз фаслидан бошлаб Пекин—Тошкент—Пекин авиақатновларини амалга ошириш режаси борлигини маълум қилган.
“Компаниямиз Жанубий Хитойдан Ўзбекистонга туристлар ҳажми ошиши билан Гуанчжоу—Тошкент—Гуанчжоу йўналишида ҳам авиқатновларни йўлга қўйишни кўриб чиқишга тайёр”, — дейди Сиао Ёнг.
Музокаралар якунида China Southern Airlines компанияси ва Бош консулхона ўртасида доимий мулоқотни давом эттириш ҳамда Хитой ҳудудлари бўйлаб Ўзбекистоннинг сайёҳлик салоҳиятига бағишланган тақдимотларни биргаликда ўтказишга аҳдлашилган.
Uzbekistan Airways авиакомпанияси Тошкент–Пекин–Тошкент йўналиши бўйича парвозларни 10 январдан тиклаган эди. Шунингдек, Ўзбекистон ва Бруней ўртасида тўғридан тўғри авиақатновлар ташкил этилиши, Ўзбекистондан Мисрга амалга ошириладиган авиақатновлар сони кўпайтирилиши, Польшадан Ўзбекистонга мунтазам авиақатновлар йўлга қўйилиши тўғрисида хабар берилганди.
Изоҳ (0)