Respublika tez tibbiy yordam markazi avtoparkiga 23-fevral kuni 117 dona Volkswagen Caddy rusumli tez tibbiy yordam mashinalari yetkazildi. Bu haqda Sog‘liqni saqlash vazirligi xabar berdi.
Vazirlik bergan ma’lumotga ko‘ra, dunyo tajribasida tez tibbiy yordam xizmatidagi avtotransport vositalarini ishlatish muddati o‘rtacha 5-8 yilni tashkil etadi. O‘zbekistonda ham foydalanilayotganiga 8 yildan oshgan avtomashinalarni yangilash lozimligi belgilangan.
Shu sababli “103” xizmatida eskirgan avtoulovlarni bosqichma-bosqich zamonaviylariga almashtirish choralari ko‘rilmoqda.
Birinchi bosqichda 230 dona B toifadagi Ford reanimobillari Tez tibbiy yordamni rivojlantirish jamg‘armasi hisobidan Toshkent va Samarqand shaharlarida foydalanish uchun yetkazib berildi. Natijada 2022 yilga kelib bunday zamonaviy avtoulovlar soni 541 taga yetdi. Ularni jihozlashda shifokor hamda bemorlarga qulaylik yaratishga alohida e’tibor berilgan.
Ikkinchi bosqichda 1000 dona A toifali tez tibbiy yordam mashinasi xarid qilinishi ko‘zda tutilgan bo‘lib, ushbu maqsadda Osiyo taraqqiyot banki loyihasi asosida kredit mablag‘lari ajratilgan. Bu orqali tizimdagi ma’nan eskirgan Damas’larini yangilash ko‘zda tutilmoqda.
Hozirgacha qariyb 340 ta Volkswagen Caddy joylarga yetkazib berildi. Ushbu avtomobillar taqsimoti hududlardagi aholi soni va tez tibbiy yordam mashinalarini yangilash ehtiyojidan kelib chiqqan holda shakllantirilmoqda.
Respublika tez tibbiy yordam markazi direktori Abduvoit G‘afurovning ma’lum qilishicha, xarid qilinishi rejalashtirilgan yana 640 ta tez tibbiy yordam mashinasi ham Hunday, Ford, Volkswagen, Iveco kabi jahon brendlariga tegishli bo‘lishi kutilmoqda.
24-yanvarda Respublika tez tibbiy yordam markaziga 110 dona Volkswagen Caddy avtomashinalari topshirilgandi
Izoh (0)