Республика тез тиббий ёрдам маркази автопаркига 23 февраль куни 117 дона Volkswagen Caddy русумли тез тиббий ёрдам машиналари етказилди. Бу ҳақда Соғлиқни сақлаш вазирлиги хабар берди.
Вазирлик берган маълумотга кўра, дунё тажрибасида тез тиббий ёрдам хизматидаги автотранспорт воситаларини ишлатиш муддати ўртача 5-8 йилни ташкил этади. Ўзбекистонда ҳам фойдаланилаётганига 8 йилдан ошган автомашиналарни янгилаш лозимлиги белгиланган.
Шу сабабли “103” хизматида эскирган автоуловларни босқичма-босқич замонавийларига алмаштириш чоралари кўрилмоқда.
Биринчи босқичда 230 дона B тоифадаги Ford реанимобиллари Тез тиббий ёрдамни ривожлантириш жамғармаси ҳисобидан Тошкент ва Самарқанд шаҳарларида фойдаланиш учун етказиб берилди. Натижада 2022 йилга келиб бундай замонавий автоуловлар сони 541 тага етди. Уларни жиҳозлашда шифокор ҳамда беморларга қулайлик яратишга алоҳида эътибор берилган.
Иккинчи босқичда 1000 дона А тоифали тез тиббий ёрдам машинаси харид қилиниши кўзда тутилган бўлиб, ушбу мақсадда Осиё тараққиёт банки лойиҳаси асосида кредит маблағлари ажратилган. Бу орқали тизимдаги маънан эскирган Damas’ларини янгилаш кўзда тутилмоқда.
Ҳозиргача қарийб 340 та Volkswagen Caddy жойларга етказиб берилди. Ушбу автомобиллар тақсимоти ҳудудлардаги аҳоли сони ва тез тиббий ёрдам машиналарини янгилаш эҳтиёжидан келиб чиққан ҳолда шакллантирилмоқда.
Республика тез тиббий ёрдам маркази директори Абдувоит Ғафуровнинг маълум қилишича, харид қилиниши режалаштирилган яна 640 та тез тиббий ёрдам машинаси ҳам Hyundai, Ford, Volkswagen, Iveco каби жаҳон брендларига тегишли бўлиши кутилмоқда.
24 январда Республика тез тиббий ёрдам марказига 110 дона Volkswagen Caddy автомашиналари топширилганди
Изоҳ (0)