Oʻzbekistondagi tez tibbiy yordam Damasʼlari Volkswagen Caddy rusumli yangi avtomobillarga almashtiriladi. Fevralda jami 250 ta ana shunday avtomobil respublika bo‘yicha tarqatiladi (foto)
Respublikadagi tez tibbiy yordam markazlarining eski Damasʼlari Volkswagen Caddy rusumli yangi A klass mashinalariga almashtirib beriladi. Bu haqda “Daryo” muxbiriga Respublika tez tibbiy yordam markazi direktori oʻrinbosari Jasur Raimjonov xabar berdi.
Jasur Raimjonovga koʻra, hozir 110 ta yangi avtomobil mavjud boʻlib, fevral oyida yana 140 dona shunday avtomashina butun respublikaga tarqatiladi. Shu bilan birga, 2023–2024-yillarda 100 ga yaqin B va C klass mashinalar olish rejalashtirilmoqda.
Hozirgi kunda Toshkent shahrida Ford rusumidagi 206 dona B klass avtomashinasi mavjud. Reanimobil hisoblanuvchi ushbu sinf mashinalari havo soʻrgich, kardiomonitor, sun’iy nafas berish uskunasi (IVL), EKG apparatlari, YTH yoki favqulodda vaziyatlardagi bemorlar uchun ishlatiladigan tibbiy shinalar va boshqa turdagi zarur qurilmalar bilan toʻliq jihozlangan.
— A klass avtomashinasi hisoblanuvchi Volkswagen Caddyʼning B klass mashinalardan farqi — uning nisbatan kichikroqligi va komplektatsiyada jihozlar kamligi. Endi C klass mashinalarini ham Oʻzbekistonga olib kelish niyatimiz bor, — deydi Jasur Raimjonov.
Shuningdek, uning ma’lum qilishicha, oʻtgan yil hisobiga Oʻzbekiston miqyosida reanimobillar soni 541 dona boʻlgan. 2022-yilning 11 oyi davomida 11,7 million dona tez yordamga chaqiriq qayd etilgan.
