Toshkent viloyatida bola o‘g‘rilari ushlangani aytilgan xabarlar rad etildi

Toshkent viloyati IIB Ohangaron tumanida noma’lum ayollar bolalarni o‘g‘irlamoqchi bo‘lgani aytilgan xabarlarga munosabat bildirdi.

Ijtimoiy tarmoqlarda Ohangaronda bola o‘g‘rilari ushlangani aytilgan video tarqaldi. Qayd etilishicha, mazkur holat Toshkent viloyati IIBB tomonidan o‘rganilgan.

“Internetda tarqatilgan ushbu xabar, mazmunan haqiqatga to‘g‘ri kelmaydi”, — deyiladi munosabatda.

Aniqlanishicha, 20-fevral kuni 3 nafar ayol hasharotlarga qarshi dori vositalarini sotish maqsadida Ohangaron shahriga borgan. Jarayonda ularning xatti-harakatidan mahalliy aholi shubhalanib (ayollar bola o‘g‘irlashmoqchi izohi bilan videoga olib), hududiy IIBga xabar bergan.

IIB xodimlari tomonidan o‘tkazilgan surishtiruv davomida ayollarning shaxsiga aniqlik kiritilgan (1985-yilda tug‘ilgan D.Sh., M.K. hamda D.Q., Toshkent shahrida yashaydi) va ularning faoliyatini o‘rganish uchun soliq organi jalb qilingan.

IIV axborot xizmati rahbari Shohrux G‘iyosov 2022-yil oktabrda ijtimoiy tarmoqlarda tarqalgan Toshkentda bola o‘g‘irilari paydo bo‘lgani haqida mish-mishlarni rad etgandi. O‘shanda u internet orqali yolg‘on ma’lumot tarqalishiga sababchi bo‘layotgan subyektlarning harakatlariga huquqiy baho berilishini bildirgan.