Har bir futbol klubining “kushandasi”ga aylangan futbolchilar bor. Masalan, Didye Drogba “Arsenal”, Harri Keyn “Lester”, Luis Suares esa “Norvich”ga gol urishni yaxshi uddalagan. Xuddi shu modelni Chempionlar Ligasida ham qo‘llash mumkin.
Ushbu sahifada Yevropaning eng nufuzli klub turnirida ishtirokini davom ettirayotgan jamoalar qaysi futbolchilardan eng ko‘p jabr ko‘rgani haqidagi statistika taqdim etiladi. Kutilganidek, bu ro‘yxatda Lionel Messi, Krishtianu Ronaldu, Karim Benzema va Robert Levandovski mavjud, biroq siz kutmagan ayrim nomlar ham yo‘q emas. Quyida bu haqida batafsil:
“Benfika”
Kushanda: Robert Levandovski
Gollar: 7
Polshalik futbolchi portugal klubiga qarshi olti bor to‘qnash kelib, ularda yettita to‘p kiritgan. Dastlabki ikki o‘yinda Robert raqib darvozasiga yo‘l topa olmagan bo‘lsa, keyingi bahslarda “Benfika”ga oson bo‘lmagan, xususan, Levandovski het-trik qayd etgan YCHL o‘tgan mavsumi guruh bosqichi o‘yinida.
“Borussiya D”
Kushanda: Krishtianu Ronaldu
Gollar: 7
So‘nggi ikkita transfer oynasida Ronaldu “Bavariya”ga o‘tishi mumkinligi haqidagi xabarlar yangradi. Biroq Krishtianu Yevropani tark etib, Saudiya Arabistoniga o‘tgani ko‘plar qatori Dortmund jamoasi muxlislari uchun ham yoqimli yangilik bo‘ldi. Chempionlar Ligasining eng yaxshi to‘purari bu ro‘yxatda bir necha bor uchrashi tabiiy hol va “Borussiya” ham o‘sha jabrdiydalar qatorida.
“Chelsi”
Kushanda: Karim Benzema
Gollar: 5
“Ko‘klar”ga qarshi to‘rtta o‘yinda beshta gol. 2020/21-yilgi mavsum yarim finalida Benzema londonliklar darvozasini bir marta ishg‘ol qilgan, biroq bu “Real”ga final yo‘llanmasini taqdim etolmagandi. Keyingi mavsumda esa “Oltin to‘p”sohibi qasos olishga muvaffaq bo‘ldi.
“Stemford Brij”dagi o‘yin Karimning benefisiga aylangandi: het-trik. Javob o‘yinida esa Benzemaning qo‘shimcha bo‘limlardagi goli madridliklarga keyingi bosqich yo‘llanmasini taqdim etadi.
“Bryugge”
Kushanda: Riyod Mahrez
Gollar: 6
Angliyada furor ko‘tarib chempionlikni qo‘lga kiritgan “Lester” Chempionlar Ligasining kelasi mavsumida murakkab bo‘lmagan guruhdan joy oladi va autsayder “Bryugge”ni ikki bor taslim etadi. Mahrez esa safarda ikkita, uy o‘yinida bitta gol uradi. Xuddi shu ishni jazoirlik futbolchi musobaqa guruh bosqichining joriy mavsumida ham amalga oshirdi. Faqat “Manchester Siti” safida.
“Ayntraxt F”
Kushanda: Son Hyon Min
Gollar: 2
Chempionlar Ligasi debyutanti dastlabki ishtirokdayoq pley-off yo‘llanmasiga ega chiqdi. Janubiy koreyalik futbolchidan tashqari hali hech kim nemis klubi darvozasiga bittadan ortiq to‘p kiritgani yo‘q.
“Bavariya”
Kushanda: Krishtianu Ronaldu
Gollar: 9
Ronaldudan jabr chekkan yana bir nemis klubi. Shubhasiz “Bavariya” ham yuqorida qayd etilgan ligadoshi singari Ronalduning boshqa mintaqaga ketganini mamnuniyat bilan qabul qildi. Portugaliyalik to‘purarning yo‘liga hatto Manuel Noyer ham to‘g‘onoq bo‘lolmagandi.
Ronaldu “Bavariya”ga barcha gollarini “Real” safida urgan, xususan, to‘plarning 5 tasi 2016/17-yilgi mavsum chorak finalida kiritilgan: birinchi o‘yinda dubl, ikkinchi bahsda het-trik. O‘shanda “qaymoqranglilar” ikki o‘yin natijasiga ko‘p 6:3 hisobini qayd etgandi.
“Portu”
Kushanda: Sadio Mane / Roberto Firmino / Muhammad Saloh
Gollar: 5
“Portu” “Liverpul”ning fantastik triosidan eng ko‘p jabr ko‘rgan klub hisoblanadi — umumiy miqdorda 15 ta gol. 2017/18-yilgi mavsumda “qizillar” portugal klubini mehmonda 5:0 hisobida taslim etadi, 2018/19-yilgi mavsumda “Dragau”dagi o‘yin 1:4 hisobida inglizlarning foydasiga hal bo‘ladi. 2021/22-yilgi mavsumda esa Portudagi o‘yinda “Liverpul” 5:1 hisobida g‘alaba qozonadi. “Portu” muxlislarining holatiga havas qilib bo‘lmaydi.
“Inter”
Kushanda: Andrey Shevchenko / Klaudio Pisarro
Gollar: 4
A Seriyadagi gollari kamlik qilgandek, Shevchenko Chempionlar Ligasida ham “neradzurri”ni ta’qib qilgan. Ukrainalik futbolchi umumiy miqdorda “Inter”ga 15 ta gol urgan, ularning 14 tasi “Derbi della Madonnina”da qayd etilgan bo‘lsa, yana biri “Dinamo K” safida kiritilgan. Ushbu gollarning 4 tasi Chempionlar Ligasida urilgan. Klaudio Pisarro “Bavariya” safida bir bor, “Verder” tarkibida esa uch marta “Inter”ga to‘p kiritgan.
“Liverpul”
Kushanda: Karim Benzema
Gollar: 6
“Enfild” ishqibozlari 21-fevral oqshomidagi “qonli o‘yin”ni uzoq vaqt unutmaydigan bo‘ldi. Benzema bu o‘yindagi dubli orqali Didye Drogba (4) va Vinisius Juniorni (5) ortda qoldirdi. “Santyago Bernabeu”da o‘yin borligini inobatga olsak, bu statistika o‘zgarishi mumkin.
“Manchester Siti”
Kushanda: Lionel Messi
Gollar: 7
Gvardiola kelgunga qadar argentinalik futbolchi ikki bor “shaharliklar” darvozasiga yo‘l topgan. Pep davrida esa besh marta “Manchester Siti” muxlislarini ranjitdi, xususan, 2016/17-yilgi mavsumda “Kamp Nou”da het-trik etdi, o‘tgan mavsum esa “PSJ” safida gol urdi.
“Milan”
Kushanda: Lionel Messi
Gollar: 8
“Manchester Siti” muxlislari yengil tortsa ham bo‘ladi. Messi A Seriya grandi darvozasini naq 8 bor ishg‘ol qilgan.
“Napoli”
Kushanda: Erling Holand / Mario Gomes
Gollar: 3
Bir necha yildan keyin Holand nomi bu ro‘yxatda ko‘proq uchrashi tabiiy. Norvegiyalik futbolchi shu vaqtga qadar “Napoli”ga uch bor to‘p kiritgan. “Bavariya” sobiq forvardi Mario Gomes esa bu ko‘rsatkichni bir o‘yindayoq qayd etib qo‘ygan.
“PSJ”
Kushanda: Karim Benzema
Gollar: 5
Parij klubiga dastlabki golini 2006-yilda urgan fransiyalik futbolchi keyingi yillar davomida yana to‘rt bor “PSJ” darvozasiga yo‘l topdi. O‘tgan yilgi javob o‘yinida Benzema tomonidan ijro etilgan het-trik Madridga keyingi bosqich eshiklarini ochgandi.
“Leypsig”
Kushanda: Irfan Jan Qahvechi / Markus Reshford
Gollar: 3
Turkiyalik futbolchi Chempionlar Ligasida bor-yo‘g‘i uchta gol urgan va ularning barchasi “Leypsig” darvozasiga bitta o‘yinda kiritilgan. Baxtga qarshi o‘sha uchrashuvda “Istanbul Bashakshehir” 3:4 hisobida yutqazib qo‘ygan. Reshford ham bir o‘yindagi het-trik orqali “buqalar”ning kushandasiga aylangan.
“Real Madrid”
Kushanda: Robert Levandovski
Gollar: 6
Bu ro‘yxatda “Real”ga qarshi turadigan o‘yinchi o‘ziga xos bo‘lishi aniq edi, albatta. Ha, bu gollarning to‘rttasi 2012/13-yilgi mavsum yarim finalidan o‘rin olgan o‘sha mashhur “Borussiya D” — “Real” uchrashuvida (4:1) kiritilgan. Endi polshalik futbolchi Yevrokuboklardagi bu harakatlarini Ispaniya maydonlarida takrorlashga urinmoqda.
“Tottenhem”
Kushanda: Krishtianu Ronaldu / Serj Gnabri
Gollar: 4
Bu ro‘yxatda Ronalduning bo‘lishi “shporlar” uchun uyatli holat emas, biroq sobiq “kanonir” haqida bunday deb bo‘lmaydi. “Tottenhem” muxlislari uchun dahshatli kechada Gnabri poker qayd etgan, o‘yin esa 7:2 hisobida “Bavariya” hisobiga hal bo‘lgandi.
Izoh (0)