Qarshi City’da 28 yoshlar atrofidagi talaba yigit ko‘p qavatli uyning 10-qavatidan o‘zini tashlab, joniga qasd qilgani aytilmoqda. Bu haqda “Daryo” muxbiri xabar berdi.
Aniqlanishicha, voqea bugun, 21-fevral kuni soat 14:00 dan 15:00 gacha bo‘lgan vaqt oralig‘ida sodir bo‘lgan.
“Voqea 14:00 dan keyin sodir bo‘lgan. Marhum talaba yigit ekan. O‘ninchi qavatdan o‘zini tashlagan. Sababi hozircha nomaʼlum”, — deydi bu haqda “Daryo” muxbiri bilan suhbatlashgan manba.
“Daryo” muxbiriga bu haqda qo‘shimcha axborot bergan ikkinchi manba esa marhum mastlik oqibatida pastga tushib ketgan bo‘lishi mumkinligini bildirgan.
“Marhum mast bo‘lgan ekan. Aytishlaricha, liftga qamalib qolgan. Keyin mast holda, asabiylashgan va liftni tepgan deyishdi. Qarshi City’ning tepa qavatidagi balkonlarda eshik va deraza oynalari sinib tushgan. Yosh bolalar uchun juda xavfli, sal eʼtiborsizlik qilinsa, tushib ketish ehtimoli bor”, — deydi bu haqda fikrlarini bildirgan bloger Otabek Ortiqov.
Mazkur holat yuzasidan Bosh prokuratura axborot xizmati ham munosabat bildirdi.
“Hozirda Qarshi shahar prokurori boshchiligida tezkor-tergov guruhi tomonidan voqea joyi ko‘zdan kechirilib, marhum fuqaroning shaxsiga va sodir etilgan holatga aniqlik kiritish maqsadida tergovga qadar tekshirish harakatlari olib borilmoqda. Natijalari haqida qo‘shimcha ravishda xabar qilinadi”, — deyiladi rasmiy axborotda.
“Daryo” voqealar rivojini kuzatishda davom etadi.
Izoh (0)