O‘zbekistonda hokim yordamchilari faoliyati yo‘lga qo‘yilishi natijasida 2 million 200 ming nafar ishsiz fuqaro bandligi taʼminlandi. Bu haqda Kambag‘allikni qisqartirish ва bandlik vaziri Behzod Musayev maʼlum qildi, deya xabar berdi “Daryo” muxbiri.
Bugun Toshkent shahridagi Hilton mehmonxonasida “O‘zbekistonda ijtimoiy adolatni mustahkamlash maqsadida munosib mehnatni ilgari surish” mavzusida xalqaro konferensiya o‘z ishini boshladi.
Konferensiyada so‘z olgan vazir Behzod Musayev so‘nggi yillarda O‘zbekistonda aholi bandligini taʼminlash maqsadida qanday ishlar olib borilgani haqida maʼlumot berdi.
“Kambag‘allikni kamaytirish va bandlikni taʼminlash bo‘yicha tizimli ishlarni yo‘lga qo‘yish maqsadida mutlaqo yangi tizim — ‘hokim yordamchilari’ instituti tashkil etildi. Hozirda respublikadagi mavjud mahallalarda 10 ming nafarga yaqin hokim yordamchilari faoliyat yuritib, ular tadbirkorlikni rivojlantirish bo‘yicha xizmat ko‘rsatmoqda. Hokim yordamchilari orqali subsidiyalar ajratish, ish bilan taʼminlash, kasbiy tayyorgarlikka jalb qilish va biznes yuritish asoslari orqali qariyb 2,2 million kishining bandligiga erishildi”, — dedi vazir.
Vazirning qayd etishicha, bugungi kunda O‘zbekistonda mehnatga layoqatli aholining 1,3 millioni ishsiz qolmoqda.
“Ayni paytda respublika bo‘ylab faoliyat ko‘rsatayotgan 26 ta ishga marhamat yagona markazi, 53 ta kasb-hunarga o‘qitish markazi, 539 ta kasb-hunar markazi, mahallalardagi o‘quv markazlari orqali mehnat bozorida talab katta bo‘lgan 70 dan ortiq kasblar bo‘yicha ishsiz fuqarolarga taʼlim berilmoqda”, — deydi Behzod Musayev.
Vazirning qo‘shimcha qilishicha, amalga oshirilgan chora-tadbirlar natijasida respublikada ishsizlik darajasi 8,9 foizga tushirilgan. Qashshoqlik darajasi ko‘rsatkichi 17 foizdan 14,1 foizga tushgan.
“Biz 2023-yilda barcha imkoniyatlarimizni ishga solib, O‘zbekistonda qashshoqlik darajasini 12 foizgacha kamaytirishni rejalashtirganmiz”, — dedi vazir.
Izoh (0)