O‘zbekiston milliy arxivida saqlanayotgan 1917-yilgacha bo‘lgan davr arxiv hujjatlaridan 56 ta yig‘majild o‘rnatilgan tartibda maxfiylikdan chiqarildi. Bu haqda AOKAda o‘tkazilgan brifingda “O‘zarxiv” agentligi axborot xizmati rahbari Anvarjon Aliyev maʼlum qildi.
Uning so‘zlariga ko‘ra, 2022-yil davomida davlat arxivlari saqloviga vazirlik va idoralar hamda tashkilotlardagi Milliy arxiv fondiga tegishli 195,2 ming saqlov birligidagi boshqaruv hujjatlari qabul qilingan hamda tashkilot va korxonalarning 408,3 ming saqlov birligidagi arxiv hujjatlari shartnoma asosida tartibga keltirilgan. 2022-yil davomida respublika arxivlariga jami 538 826 ta mavzuli va ijtimoiy-huquqiy mazmundagi so‘rovlar kelib tushgan bo‘lib, shundan 83 332 ta mavzuli, 455 494 ta ijtimoiy-huquqiy mazmundagi so‘rovlar kelib tushgan. Shundan 440 373 ta so‘rov ijrosi taʼminlangan. Tashkilot hujjatlari arxiv saqloviga kelib tushmagan va taaluqligi bo‘yicha tegishli tashkilotlarga yuborilgan so‘rovlar soni 98 453 tani tashkil etadi.
Davlat arxivlari tomonidan 1-yanvar holatiga jami 880,9 ming saqlov birligidagi 53,0 million kadr raqamlashtirilgan. Tasdiqlangan rejaga muvofiq, 2022-yil boshidan 100 ming saqlov birligidagi 15,2 million kadr raqamlashtirilgan. 2023-yil 24-yanvar holatiga ko‘ra davlat arxivlari tomonidan e.arxiv.uz – “Davlat arxivlarida raqamlashtirilayotgan hujjatlarni yagona saqlovini taʼminlash hamda ulardan foydalanish” axborot tizimida jami 45370 ta fond, 39 586 ta ro‘yxat, 318 334 saqlov birligi va 57 794 ta hujjat yaratilgan.
Mazkur tizimning joriy qilinishi natijasida Milliy arxiv fondiga kiritilgan arxiv hujjatlarining markazlashgan saqlovini tashkil qilish, tizimga kiritilgan fond, ro‘yxat, saqlov birligi, arxiv hujjatlari bo‘yicha onlayn ravishda foydalanish imkoniyati yaratilmoqda.
Bundan tashqari, maxfiylikdan chiqarish yo‘nalishida ham tizimli ishlar amalga oshirilib kelinmoqda va tadqiqotchilar uchun hujjatlar ochiq fondga o‘tkazilgan holda foydalanish uchun taqdim etilmoqda. O‘zbekiston milliy arxivida saqlanayotgan tarixiy davr (1917-yilgacha) bo‘lgan arxiv hujjatlaridan 10 ta fonddan jami 56 ta yig‘majild o‘rnatilgan tartibda maxfiylikdan chiqarilgan.
Izoh (0)