O‘zbekiston zilziladan jabr ko‘rgan Suriyaga insonparvarlik yordami yubordi

Shavkat Mirziyoyev topshirig‘iga ko‘ra 21-fevral kuni Suriyaning zilziladan jabr ko‘rgan aholisi uchun insonparvarlik yordami yuborildi.

O‘zAning xabar qilishicha, qariyb 50 tonnaga yaqin yuborilayotgan insonparvarlik yordami yuki ro‘yxatiga bolalar va kattalar uchun kiyimlar, maishiy texnika vositalari, chidamli oziq-ovqat konservalari, quruq mevalar, yarim tayyor ovqatlar, chaqaloqlar bo‘tqasi, odyol va yostiqlar, gigiyenik vositalar to‘plami singari hayotiy zarur vosita va mahsulotlar kiritilgan.

Insonparvarlik yuki yordami ko‘rinishidagi hayotiy zarur vosita va mahsulotlarni samolyot orqali O‘zbekistondan Suriyaga Favqulodda vaziyatlar, Transport vazirliklari mas’ul xodimlari yetkazib beradi.

13-fevral kuni O‘zbekistondan Turkiyaga navbatdagi 6-insonparvarlik yordami yuki topshirilgandi. Turk ommaviy axborot vositalarining xabar berishicha, O‘zbekiston Turkiyaning zilziladan jabr ko‘rgan hududlariga hozirgacha 170 tonna insonparvarlik yuki jo‘natgan.