Қарши City’да 28 ёшлар атрофидаги талаба йигит кўп қаватли уйнинг 10-қаватидан ўзини ташлаб, жонига қасд қилгани айтилмоқда. Бу ҳақда “Дарё” мухбири хабар берди.
Аниқланишича, воқеа бугун, 21 февраль куни соат 14:00 дан 15:00 гача бўлган вақт оралиғида содир бўлган.
“Воқеа 14:00 дан кейин содир бўлган. Марҳум талаба йигит экан. Ўнинчи қаватдан ўзини ташлаган. Сабаби ҳозирча номаълум”, — дейди бу ҳақда “Дарё” мухбири билан суҳбатлашган манба.
“Дарё” мухбирига бу ҳақда қўшимча ахборот берган иккинчи манба эса марҳум мастлик оқибатида пастга тушиб кетган бўлиши мумкинлигини билдирган.
“Марҳум маст бўлган экан. Айтишларича, лифтга қамалиб қолган. Кейин маст ҳолда, асабийлашган ва лифтни тепган дейишди. Қарши City’нинг тепа қаватидаги балконларда эшик ва дераза ойналари синиб тушган. Ёш болалар учун жуда хавфли, сал эътиборсизлик қилинса, тушиб кетиш эҳтимоли бор”, — дейди бу ҳақда фикрларини билдирган блогер Отабек Ортиқов.
Мазкур ҳолат юзасидан Бош прокуратура ахборот хизмати ҳам муносабат билдирди.
“Ҳозирда Қарши шаҳар прокурори бошчилигида тезкор-тергов гуруҳи томонидан воқеа жойи кўздан кечирилиб, марҳум фуқаронинг шахсига ва содир этилган ҳолатга аниқлик киритиш мақсадида терговга қадар текшириш ҳаракатлари олиб борилмоқда. Натижалари ҳақида қўшимча равишда хабар қилинади”, — дейилади расмий ахборотда.
“Дарё” воқеалар ривожини кузатишда давом этади.
Изоҳ (0)