2023-yil yanvar oyida O‘zbekistonning tashqi savdo aylanmasi 5 mlrd dollarga yetdi. Bu haqda Statistika agentligi xabar bermoqda.
-6.jpg)
Tashqi savdo aylanmasi o‘tgan yilning ilk oyiga nisbatan 1,5 mlrd dollarga yoki 42 foizga ko‘paydi. Bunda eksport 2,1 mlrd dollarni, import 2,9 mlrd dollarni tashkil qildi. Salbiy saldo — 877 mln dollar.
O‘zbekiston jahonning 134 mamlakati bilan savdo aloqalarini amalga oshirib kelmoqda. Tashqi savdoning nisbatan salmoqli hissasi Rossiya (13,7 foiz), Xitoy (10,8 foiz), Germaniya (9,8 foiz), Qozog‘iston (6,6 foiz), Turkiya (5,2 foiz), Koreya (2,8 foiz) va Litvada (2,2 foiz) qayd etilgan.
Tashqi iqtisodiy faoliyat bo‘yicha 20 ta yirik hamkor-davlatlar orasidan atigi uchta davlatda ijobiy tashqi savdo balansi kuzatilgan. Bular — Afg‘oniston, Tojikiston va Qirg‘iziston.
O‘zbekiston nima sotdi?
Yanvarda O‘zbekiston 1,2 mlrd dollarlik oltin sotgan. Bu 2022-yilning mos davriga nisbatan 2 barobar ko‘pdir. Mamlakatning oltindan tashqari eksporti 901 mln dollarni tashkil qildi.
Eksportda asosiy ulush oltin (56,8 foiz), sanoat tovarlari (13,1 foiz) va xizmatlar (13,1 foiz) hissasiga to‘g‘ri keladi.
Shuningdek, yanvarda noorganik kimyoviy moddalar eksporti o‘tgan yilning yanvariga nisbatan 11 barobarga, cho‘yan va p‘olat 4,2 barobarga, ichimliklar 2,7 barobarga oshgan.
O‘tgan oy 67,5 ming tonna meva va sabzavotlar eksporti amalga oshirilgan bo‘lib, ushbu ko‘rsatgich 2022-yilning mos davriga nisbatan 1,2 barobarga yoki 11,3 ming tonnaga kamaydi.
Bundan tashqari 218,7 mln dollarilik to‘qimachilik mahsulotlari eksporti qilinib, umumiy eksportning 10,5 foizini tashkil etdi va o‘tgan yilga nisbatan 14,5 foizga kamaydi.
Yanvar oyida eksport bo‘yicha asosiy hamkor davlatlar Rossiya (10,2 foiz), Turkiya (5,2 foiz) va Xitoy (4 foiz) bo‘ldi.
O‘zbekiston nima sotib oldi?
Import tarkibida eng katta ulush, mashinalar va transport asbob-uskunalari (45,6 foiz), sanoat tovarlari (13,4 foiz) hamda kimyoviy vositalar va shunga o‘xshash mahsulotlar (12,1 foiz) hisobiga to‘g‘ri keldi.
O‘zbekiston yanvarda transport uskunalari importini keskin oshirdi. Germaniyadan 459 mln dollarlik mashina va transport asbob-uskunalari import qilingan. Natijada Germaniya O‘zbekistonb importidagi asosiy hamkor davlatga aylandi.
Import bo‘yicha asosiy hamkorlar orasiga Singapur ham qo‘shilgan. O‘tgan yilning yanvarida ushbu davlatdan 1,4 mln dollarlik import amalga oshirilgan edi. 2023-yilning ilk oyida bu ko‘rsatkich 62,4 mln dollarni tashkil qildi.
Shuningdek, 2022-yilning dastlabki oyi bilan solishtirilganda O‘zbekistonning Xitoy va Koreyadan importi kamaygan.
Izoh (0)