O‘zbekistonning 2022-yilgi tashqi savdo aylanmasi 50 mlrd dollardan oshdi. Bu haqda Davlat statistika qo‘mitasi hisobotidan ma’lum bo‘ldi.
Mamlakatda tashqi savdo aylanmasi o‘tgan yili 50,008 mlrd dollarni tashkil qilib. 2021-yilga nisbatan 7,8 mlrd dollarga yoki 18,6 foizga ko‘paydi.
Tashqi savdoda eksport hajmi 19,3 mlrd dollarga (15,9 foizga ko‘paydi) va import hajmi 30,7 mlrd dollarga (20,4 foizga ko‘paydi) yetdi. Yil davomida 11,4 mlrd dollarlik passiv tashqi savdo balansi qayd etildi.
2022-yilda O‘zbekiston tashqi savdoda eng ko‘p Rossiya bilan hamkorlik qildi — umumiy 9,3 mlrd dollar. Bu davrda O‘zbekiston Rossiyaga 3,1 mlrd dollarlik eksport qilgan bo‘lsa, import 6,2 mlrd dollarni tashkil qildi.
Tashqi savdo bo‘yicha keyingi o‘rinda 8,9 mlrd dollar bilan Xitoy bo‘ldi. Bunda eksport 2,5 mlrd dollar, import 6,4 mlrd dollar bo‘lgan.
O‘zbekiston tashqi savdo aylanmasida hamon uchinchi o‘rinda Qozog‘iston bormoqda — 4,6 mlrd dollar. Yil davomida ushbu mamlakatga eksport 1,4 mlrd dollarni, import 3,2 mlrd dollarni tashkil qilgan.
Tashqi iqtisodiy faoliyat bo‘yicha 20 ta yirik hamkor-davlatlar orasidan uchta davlatda faol tashqi savdo balansi kuzatilgan. Bular Afg‘oniston, Qirg‘iz Respublikasi va Tojikistondir. Qolgan 17 ta davlatlar bilan passiv tashqi savdo balansi saqlanib qolmoqda.
Izoh (0)