Асосий импорт ҳамкорига айланган Германия, икки баробар ошган олтин экспорти: январда Ўзбекистон ташқи савдоси қандай бўлди

2023 йил январь ойида Ўзбекистоннинг ташқи савдо айланмаси 5 млрд долларга етди. Бу ҳақда Статистика агентлиги хабар бермоқда.  

Ташқи савдо айланмаси ўтган йилнинг илк ойига нисбатан 1,5 млрд долларга ёки 42 фоизга кўпайди. Бунда экспорт 2,1 млрд долларни, импорт 2,9 млрд долларни ташкил қилди. Салбий салдо — 877 млн доллар. 

Ўзбекистон жаҳоннинг 134 мамлакати билан савдо алоқаларини амалга ошириб келмоқда. Ташқи савдонинг нисбатан салмоқли ҳиссаси Россия (13,7 фоиз), Хитой (10,8 фоиз), Германия (9,8 фоиз), Қозоғистон (6,6 фоиз), Туркия (5,2 фоиз), Корея (2,8 фоиз) ва Литвада (2,2 фоиз) қайд этилган. 

Ташқи иқтисодий фаолият бўйича 20 та йирик ҳамкор-давлатлар орасидан атиги учта давлатда ижобий ташқи савдо баланси кузатилган. Булар — Афғонистон, Тожикистон ва Қирғизистон. 

Ўзбекистон нима сотди?

Январда Ўзбекистон 1,2 млрд долларлик олтин сотган. Бу 2022 йилнинг мос даврига нисбатан 2 баробар кўпдир. Мамлакатнинг олтиндан ташқари экспорти 901 млн долларни ташкил қилди. 

Экспортда асосий улуш олтин (56,8 фоиз), саноат товарлари (13,1 фоиз) ва хизматлар (13,1 фоиз) ҳиссасига тўғри келади. 

Шунингдек, январда ноорганик кимёвий моддалар экспорти ўтган йилнинг январига нисбатан 11 баробарга, чўян ва пўлат 4,2 баробарга, ичимликлар 2,7 баробарга ошган. 

Ўтган ой 67,5 минг тонна мева ва сабзавотлар экспорти амалга оширилган бўлиб, ушбу кўрсатгич 2022 йилнинг мос даврига нисбатан 1,2 баробарга ёки 11,3 минг тоннага камайди. 

Бундан ташқари 218,7 млн долларилик тўқимачилик маҳсулотлари экспорти қилиниб, умумий экспортнинг 10,5 фоизини ташкил этди ва ўтган йилга нисбатан 14,5 фоизга камайди.

Январь ойида экспорт бўйича асосий ҳамкор давлатлар Россия (10,2 фоиз), Туркия (5,2 фоиз) ва Хитой (4 фоиз) бўлди. 

Ўзбекистон нима сотиб олди? 

Импорт таркибида энг катта улуш, машиналар ва транспорт асбоб-ускуналари (45,6 фоиз), саноат товарлари (13,4 фоиз) ҳамда кимёвий воситалар ва шунга ўхшаш маҳсулотлар (12,1 фоиз) ҳисобига тўғри келди.

Ўзбекистон январда транспорт ускуналари импортини кескин оширди. Германиядан 459 млн долларлик машина ва транспорт асбоб-ускуналари импорт қилинган. Натижада Германия Ўзбекистонб импортидаги асосий ҳамкор давлатга айланди. 

Импорт бўйича асосий ҳамкорлар орасига Сингапур ҳам қўшилган. Ўтган йилнинг январида ушбу давлатдан 1,4 млн долларлик импорт амалга оширилган эди. 2023 йилнинг илк ойида бу кўрсаткич 62,4 млн долларни ташкил қилди. 

Шунингдек, 2022 йилнинг дастлабки ойи билан солиштирилганда Ўзбекистоннинг Хитой ва Кореядан импорти камайган.