AQSH prezidenti Jo Bayden Kiyevga kelganini rasman tasdiqladi. Bu haqda uning Twitter’dagi sahifasida xabar berildi.
“Rossiyaning Ukrainaga shafqatsizlarcha bostirib kirishiga bir yil to‘lar ekan, men prezident Zelenskiy bilan uchrashish va Ukrainaning demokratiyasi, suvereniteti hamda hududiy yaxlitligiga qatʼiy sodiqligimizni tasdiqlash uchun bugun Kiyevdaman.
Putin qariyb bir yil oldin o‘z bosqinini boshlaganida, Ukrainani kuchsiz, G‘arbni bo‘lingan, deb o‘ylagandi. U bizdan o‘zib ketaman deb o'ylagandi. Ammo u qattiq adashdi”, — deb yozgan Bayden Twitter’da.
Uning qo‘shimcha qilishicha, Rossiya bosqini davom etayotgan bir yil ichida AQSH Ukrainaga o‘zini himoya qilishda yordam berish uchun “Atlantikadan Tinch okeanigacha bo‘lgan davlatlar koalitsiyasini” tuzgan. Bayden Kiyevni qo‘llab-quvvatlash buyog‘iga ham davom etishini ta’kidladi.
Jo Baydenning e’lon qilinmagan tashrif bilan Kiyevga kelgani haqidagi mish-mishlar 20-fevral kuni ertalab tarqala boshladi. Keyinroq Ukraina ommaviy axborot vositalari Baydenni Ukraina prezidenti Vladimir Zelenskiy bilan Kiyevdagi Mixayliv maydonida tasvirga olishdi, Ukraina rahbari ham amerikalik hamkasbi Kiyevga kelganini tasdiqladi.
Bu AQSH prezidentining so‘nggi 15 yil ichida Ukrainaga ilk tashrifidir. Oxirgi marta 2008-yilda o‘sha paytdagi prezident Jorj Bush Kiyevga kelgandi. Shu bilan birga, Jo Bayden ilgari Barak Obama ma’muriyatida vitse-prezident bo‘lib ishlagan paytda olti marta Kiyevda bo‘lgan.
2022-yil dekabr oyida Vladimir Zelenskiy urush boshlanganidan beri ilk xorijiy tashrifi bilan AQSHga borgandi. Vashingtonda Zelenskiy Bayden bilan uchrashib, Kongressda nutq so‘zlagan.
Izoh (0)