Shimoliy Koreya 20-fevral kuni Yapon dengizi tomonga ikkita qisqa masofali ballistik raketa uchirdi, deb xabar bermoqda Yonhap axborot agentligi Janubiy Koreya harbiylariga tayanib.
Janubiy Koreya Qurolli kuchlari shtab boshliqlari birlashgan qo‘mitasi Janubiy Pxenyan provinsiyasidagi Sukchxon hududidan ertalab soat 7:00—7:11 (Toshkent vaqti bilan 3:00 va 3:11) oralig‘ida ikkita qisqa masofali raketa uchirilganini qayd etdi.
Birinchi raketa 100 kilometr balandlikda uchgan, parvoz masofasi taxminan 400 kilometr bo‘lgan. Ikkinchi raketaning parvoz balandligi 50 kilometrni, masofasi taxminan 350 kilometrni tashkil qilgan.
Yaponiya Shimoliy Koreyaning Yapon dengiziga raketa uchirishi ortidan Birlashgan Millatlar Tashkiloti Xavfsizlik Kengashining favqulodda yig‘ilishini talab qildi.
BMT bosh kotibi Antoniu Guterrish Shimoliy Koreya tomonidan ballistik raketalar uchirilishini qoraladi va Pxenyanni provokatsion qadamlardan tiyilishga chaqirdi.
“Bosh kotib KXDR tomonidan navbatdagi qit’alararo uzoqlikdagi ballistik raketa uchirilishini keskin qoralaydi”, — dedi bosh kotib matbuot kotibi Stefan Dyujarrik BMT veb-saytidagi izohida.
Qayd etilishicha, Guterrish Pxenyanni “har qanday boshqa provokatsion harakatlardan zudlik bilan tiyilishga, BMT Xavfsizlik Kengashining barcha tegishli rezolyutsiyalari bo‘yicha o‘z xalqaro majburiyatlarini to‘liq bajarishga va Koreya yarimorolida barqaror tinchlik, to‘liq yadrosizlanishga olib keladigan muloqotni tiklashga” chaqirmoqda.
Shimoliy Koreya AQSH va Janubiy Koreyaning qo‘shma harbiy mashg‘ulotlari fonida ballistik raketalar uchirmoqda. 18-fevral kuni Pxenyan “Xvason-15” raketasini uchirgandi, Yaponiya mudofaa vazirligiga ko‘ra, bu raketda AQSH hududga yetib borishga qodir. Bir kun o‘tib Vashington va Seul qo‘shma mashg‘ulotlar haqida e’lon qildi.
Shimoliy Koreya tomoni bu manyovrlarga “qat’iy javob” va’da qildi. Shimoliy Koreya yetakchisining singlisi va Mehnat partiyasi Markaziy qo‘mitasi bo‘lim boshlig‘i o‘rinbosari Kim Yo Chjon AQSHning harakatlariga javoban Tinch okeani tomon raketa uchirishlar sonini ko‘paytirish bilan tahdid qildi.
Izoh (0)