“Путин босқин бошлаганида, Украинани кучсиз, Ғарбни бўлинган, деб ўйлаганди. Аммо у қаттиқ адашди”. Байден Киевга ташрифини изоҳлади

АҚШ президенти Жо Байден Киевга келганини расман тасдиқлади. Бу ҳақда унинг Twitter’даги саҳифасида хабар берилди.

“Россиянинг Украинага шафқатсизларча бостириб киришига бир йил тўлар экан, мен президент Зеленский билан учрашиш ва Украинанинг демократияси, суверенитети ҳамда ҳудудий яхлитлигига қатъий содиқлигимизни тасдиқлаш учун бугун Киевдаман.

Путин қарийб бир йил олдин ўз босқинини бошлаганида, Украинани кучсиз, Ғарбни бўлинган, деб ўйлаганди. У биздан ўзиб кетаман деб ўйлаганди. Аммо у қаттиқ адашди”, — деб ёзган Байден Twitterъда.

Унинг қўшимча қилишича, Россия босқини давом этаётган бир йил ичида АҚШ Украинага ўзини ҳимоя қилишда ёрдам бериш учун “Атлантикадан Тинч океанигача бўлган давлатлар коалициясини” тузган. Байден Киевни қўллаб-қувватлаш буёғига ҳам давом этишини таъкидлади.

Жо Байденнинг эълон қилинмаган ташриф билан Киевга келгани ҳақидаги миш-мишлар 20 февраль куни эрталаб тарқала бошлади. Кейинроқ Украина оммавий ахборот воситалари Байденни Украина президенти Владимир Зеленский билан Киевдаги Михайлив майдонида тасвирга олишди, Украина раҳбари ҳам америкалик ҳамкасби Киевга келганини тасдиқлади.

Бу АҚШ президентининг сўнгги 15 йил ичида Украинага илк ташрифидир. Охирги марта 2008 йилда ўша пайтдаги президент Жорж Буш Киевга келганди. Шу билан бирга, Жо Байден илгари Барак Обама маъмуриятида вице-президент бўлиб ишлаган пайтда олти марта Киевда бўлган.

2022 йил декабрь ойида Владимир Зеленский уруш бошланганидан бери илк хорижий ташрифи билан АҚШга борганди. Вашингтонда Зеленский Байден билан учрашиб, Конгрессда нутқ сўзлаган.