Polsha prezidenti Anjey Duda NATO davlatlarini Ukrainaga urushdan keyingi xavfsizlik kafolatlarini berishga chaqirdi. Uning fikricha, bu askarlar ruhiyati uchun muhim, deb yozmoqda Financial Times.
Duda xavfsizlik kafolatlari va’dasi va NATOning qo‘llab-quvvatlovini his qilish Ukraina rasmiylari uchun ham, askarlari uchun ham muhim ekanini qayd etgan.
FT taʼkidlaganidek, NATO mamlakatlari Ukrainaga bera oladigan kafolatlar boshqacha tuzilishda bo‘lib, NATOning yetakchi kuchlarini, masalan, AQSH, Buyuk Britaniya va Fransiyani kelajakda Ukrainaga hujum qilingan taqdirda harbiy yordam ko‘rsatishga majbur qiladi. NATOning sobiq bosh kotibi Anders Fog Rasmussen bunday kafolatlarni Isroil AQSHdan olgan kafolatlarga o‘xshash deb ta’rifladi.
Ukraina NATO a’zosi emas, ammo 2020-yil iyun oyida mamlakat alyans bilan hamkorlikning alohida maqomiga ega bo‘ldi — bu ukrain qo‘shinlarining alyans kuchlari bilan o‘zaro hamkorligini kuchaytirish imkonini beruvchi kengaytirilgan imkoniyatlarni taqdim qiladi, biroq NATOga soddalashtirilgan tartibda qo‘shilish va kelajakda albatta unga a’zo bo‘lishni anglatmaydi.
Urush boshlanganidan keyin Kiyev o‘zining xavfsizlik kafolatlari loyihasini taklif qilgandi, unda AQSH, Buyuk Britaniya, Kanada, Polsha, Italiya, Germaniya, Fransiya, Avstraliya va Turkiya kafil sifatida taklif qilingan. Hujjatda asosiy kafolatlar qatorida Ukraina harbiy-sanoat kompleksiga sarmoya kiritish, unga razvedka ma’lumotlarini uzatish hamda respublika Qurolli kuchlarini Yevropa Ittifoqi va NATO rahbarligida tayyorlash kabilar qayd etilgan.
Izoh (0)