Braziliya janubi-sharqidagi San-Paulu shtatida kuchli yomg‘irlar oqibatida 36 kishi halok bo‘ldi, deb xabar bermoqda Globo mahalliy ma’muriyatga tayanib.
Jabrlanganlardan biri — yetti yoshli qizcha Ubatuba munitsipalitetida, o‘zi yashab turgan uy ustiga og‘irligi 2 tonna tosh qulashi oqibatida halok bo‘lgan. San-Sebastyan munitsipalitetida yana 35 kishi yog‘ingarchilik qurboniga aylangan.
Bundan tashqari, shtat hukumati ma’lumotlariga ko‘ra, yomon ob-havo tufayli 228 kishi uylarini tark etishga majbur bo‘lgan. Yana 338 nafar mahalliy aholi boshpanasiz qolgan. San-Sebastyan rahbari Felipe Augustoning so‘zlariga ko‘ra, munitsipalitetda 50 ta uy qulagan. San-Pauluning ayrim hududlarida aloqa, elektr va suv uzilib qoldi, deb yozmoqda Globo.
Odamlarni qidirish bilan aviatsiya va o‘t o‘chiruvchi guruhlar shug‘ullanmoqda. Ubatuba, San-Sebastyan va ularga qo‘shni bir qancha munitsipalitetlarda favqulodda holat eʼlon qilindi. Braziliya prezidenti Luis Inasiu Lula da Silva 20-fevral kuni jabrlangan munitsipalitetlarga tashrif buyurishi rejalashtirilgan.
Yanvar oyidan beri San-Pauluda yomg‘ir yog‘moqda. O‘tgan oy shtatda 378,6 mm yog‘ingarchilik kuzatildi — bu odatiy me’yordan 30 foiz ko‘p. 18-fevral kuni kechqurun shtatda yana bir katta jala boshlandi.
Izoh (0)