Moliya vazirligi 2022-yil uchun davlat budjeti daromadlari yakuniy ko‘rsatkichini e’lon qildi.
Davlat budjeti daromadlari 2022-yilda 202 trln so‘m bo‘lib, 2021-yilga nisbatan 37,2 trln so‘mga yoki 22,6 foizga oshdi.
O‘tgan yili Davlat budjeti daromadlarining YIMdagi ulushi 22,7 foizni tashkil etib, bu ko‘rsatkich 2021-yilga nisbatan solishtirilganda 0,3 foizga va 2020 yilga nisbatan 0,6 foizga oshdi.
Hisobot yilida Davlat budjeti tarkibidagi Soliq qo‘mitasi ma’murchiligidagi tushumlar 148,4 trln so‘mni (jami Davlat budjeti daromadlariga nisbatan 73,4 foiz), Bojxona qo‘mitasi bo‘yicha tushumlar 46 trln so‘mni (22,8 foiz) hamda boshqa daromadlar va soliq bo‘lmagan tushumlar 7,6 trln so‘mni (3,8 foiz) tashkil qildi. Bunda QQS bo‘yicha qoplab berish (19,3 trln so‘m) va fuqarolarga xarid summasidan 1 foiz keshbek qaytarish (0,8 trln so‘m) hisobga olingan.
Soliq qo‘mitasi bo‘yicha belgilangan prognoz 6 trln so‘mga yoki 4,2 foizga ortig‘i bilan bajarildi. Tushumlar 2021-yilga nisbatan 20,4 trln so‘mga yoki 16 foizga, 2020-yilga nisbatan esa 44,8 trln so‘mga yoki 43,3 foizga oshdi.
Shu bilan birga, bojxona qo‘mitasi bo‘yicha belgilangan prognoz 4,9 mlrd so‘m yoki 11,9 foizga ortig‘i bilan bajarildi.
Tushumlar 2021-yilga nisbatan 12,8 trln so‘m yoki 38,5 foizga, 2020-yilga nisbatan esa 21,3 trln so‘m yoki 86,3 foizga oshdi.
2021-yilga nisbatan bevosita soliqlar, resurs to‘lovlari hamda mol-mulk solig‘ining Davlat budjeti daromadlaridagi ulushi kamaygan bo‘lsa, bilvosita soliqlar hamda boshqa daromadlar va soliq bo‘lmagan tushumlarning ulushi oshdi.
Yirik soliq to‘lovchilar bo‘yicha hududlararo soliq inspeksiyasi bo‘yicha 2022-yilda tushumlar 88,3 trln so‘mni tashkil etib, 2021-yilga nisbatan 6 trln so‘mga yoki 7,3 foizga oshdi.
Izoh (0)